Zbardhen detaje të reja nga vrasja e 45-vjeçares në Athinë, ndërsa ekspertiza mjeko-ligjore, e kombinuar me provat e mbledhura nga autoritetet, ka hedhur më shumë dritë mbi momentet e fundit të viktimës dhe dinamikën e krimit.
Sipas informacioneve, 48-vjeçari kishte mbërritur më herët pranë pallatit ku banonte gruaja dhe po e priste jashtë. Sapo 45-vjeçarja hapi derën e hyrjes, ai dyshohet se hyri në ndërtesë së bashku me të.
Ngjarja më pas është zhvilluar brenda pak sekondash. 48-vjeçari dyshohet se e goditi gruan një ose dy herë me shqelm, duke e rrëzuar në tokë, dhe më pas i drejtoi armën.
45-vjeçarja ngriti instinktivisht duart drejt armës në përpjekje për t’u mbrojtur. Sipas të dhënave të raportuara, ky reagim dyshohet se bëri që e shtëna e parë të mos e godiste.
Menjëherë më pas, autori dyshohet se e tërhoqi gruan rreth një metër dhe e qëlloi sërish, këtë herë në kokë, duke i shkaktuar vdekjen.
Pas krimit, 48-vjeçari e drejtoi revolen ndaj vetes dhe kreu vetëvrasje. Sipas informacioneve të deritanishme, arma mbahej prej tij në mënyrë të paligjshme.
Kamerat regjistruan lëvizjet e 48-vjeçarit
Në qendër të hetimeve janë edhe pamjet e kamerave të sigurisë në zonë. Ato dyshohet se kanë regjistruar lëvizjet e 48-vjeçarit përpara krimit, duke treguar se ai kishte mbërritur më herët dhe po priste viktimën pranë pallatit.
Hetuesit po shqyrtojnë gjithashtu pajisjet elektronike të autorit, në kërkim të komunikimeve dhe të dhënave që mund të hedhin më shumë dritë mbi raportin e tij me 45-vjeçaren dhe atë që kishte ndodhur në periudhën përpara vrasjes.
Viktima i kishte treguar motrës se kishte frikë
Sipas informacioneve, 45-vjeçarja kishte folur me motrën për marrëdhënien me një burrë, duke i treguar se kishte vendosur të ndahej prej tij për shkak të xhelozisë.
Ajo dyshohet se i kishte rrëfyer gjithashtu se ai vazhdonte të këmbëngulte dhe se kishte frikë prej tij.
Natën e krimit, viktima ndodhej e vetme në banesë. Vajza e saj nuk ishte në Athinë, pasi kishte udhëtuar drejt Agrinios me xhaxhain e saj.
I la bashkëshortes 1 mijë euro para krimit
Detaje të tjera janë zbuluar edhe për lëvizjet e 48-vjeçarit përpara se të shkonte në Nea Smyrni. Sipas informacioneve, para se të largohej nga shtëpia, ai i la bashkëshortes 1 mijë euro dhe i tha t’i mbante paratë.
Bashkëshortja u ka deklaruar autoriteteve se gjatë 18 muajve të fundit kishte vënë re ndryshime në sjelljen e tij. Sipas dëshmisë së raportuar, 48-vjeçari mungonte shpesh nga shtëpia dhe kishte raste kur flinte diku tjetër, pa i treguar asaj se ku qëndronte.
Ajo gjithashtu raportohet se u ka thënë hetuesve se kishte frikë prej tij. Autoritetet greke po vijojnë hetimet dhe analizimin e provave për të zbardhur plotësisht rrethanat dhe motivin e krimit.
