Pas një pauze pesëmujore të mbushur me debat dhe hetime, Rumania voton sot sërish për të zgjedhur presidentin e ri, në një proces që rifillon nga e para pas anulimit të zgjedhjeve të vitit të kaluar për shkak të parregullsive të rënda.
Favorit për të udhëhequr garën është George Simion, një figurë e njohur e së djathtës ekstreme nga Aleanca për Bashkimin e Rumunëve (AUR). Por sipas parashikimeve, askush nga 11 kandidatët nuk do të arrijë të marrë shumicën e nevojshme në këtë raund, duke e bërë të pashmangshëm balotazhin më 18 maj.
Qendrat e votimit janë hapur që nga ora 06:00 e mëngjesit dhe do të qëndrojnë të hapura deri në orën 20:00. Gara e sotme zhvillohet në një klimë të ngarkuar nga skandali i zgjedhjeve të mëparshme, ku kandidati kryesor, Călin Georgescu, me retorikë pro-ruse dhe fushatë të fokusuar në TikTok, u skualifikua nga gara pas ndërhyrjes së Gjykatës Kushtetuese dhe nisjes së një hetimi penal ndaj tij.
Ndërkohë, mbetet e paqartë se kush do të jetë rivali i Simionit në raundin e dytë – në lojë janë figura të njohura si Nicușor Dan, kryetar i Bashkisë së Bukureshtit dhe përfaqësues i Partisë Kombëtare Liberale (PNL), apo Victor Ponta, ish-kryeministër i krahut socialdemokrat.
Simion ka lënë të kuptohet se, nëse fiton, do të kërkojë “drejtësi” për Georgescun, madje nuk e ka përjashtuar mundësinë ta emërojë atë si kryeministër – një sinjal shqetësues për ata që i frikësohen kthesave autoritare në politikën rumune.
Presidenti në Rumani ka kompetenca kyçe në politikën e jashtme dhe sigurinë kombëtare – çka e bën rezultatin e këtyre zgjedhjeve me ndikim shumë më të gjerë se kufijtë e vendit.
