Një nga speciet më të rrezikuara të botës detare, balena e djathtë e Atlantikut të Veriut, ka shënuar një sezon shqetësues lindjeje, duke sjellë në jetë vetëm 11 të vegjël – shumë larg 50 që nevojiten për të nisur rikuperimin e popullatës.
Me rreth 370 individë të mbetur dhe vetëm 70 femra të afta për riprodhim, situata është bërë alarmante për shkencëtarët dhe ambientalistët.
Balenat lindin përgjatë bregut juglindor të SHBA nga nëntori deri në prill.
Sipas Akuariumit të Anglisë së Re në Boston, numri i të vegjëlve këtë vit është një ndër më të ulëtit e dekadës së fundit, çka nxit frikën se specia mund të mos arrijë të mbijetojë.
Ekspertët fajësojnë një sërë faktorësh për këtë ngadalësim të riprodhimit: stresin e shkaktuar nga përplasjet me anijet e mëdha, ngatërresat në pajisjet e peshkimit, zhurmën e shtuar të oqeanit si dhe ndryshimin e shpërndarjes së burimeve ushqimore.
Fondi Ndërkombëtar për Mirëqenien e Kafshëve theksoi se këto kushte të vështira ndikojnë drejtpërdrejt në aftësinë e balenave për të riprodhuar.
Megjithatë, ka edhe shenja shprese. Katër nga balenat që lindën këtë vit ishin nëna për herë të parë, çka sipas ekspertëve tregon potencial për shtim të popullatës riprodhuese në të ardhmen.
“Ndërsa numri i të vegjëlve është relativisht i ulët, jam i inkurajuar nga katër nëna të reja që po shtohen në pishinën riprodhuese”, deklaroi Philip Hamilton nga Qendra Anderson Cabot për Jetën Oqeanike.
Balenat e djathta të Atlantikut të Veriut, të cilat migrojnë drejt Kanadasë dhe Anglisë së Re për t’u ushqyer, kanë qenë objekt i mbrojtjes për dekada pas shfrytëzimit të tyre masiv gjatë epokës së gjuetisë komerciale.
Por ndryshe nga disa specie të tjera, ato kanë treguar rikuperim shumë të ngadaltë.
Shkencëtarët bëjnë thirrje për rritje të masave mbrojtëse, përfshirë kufizimin e shpejtësisë së anijeve në zonat ku lëvizin balenat dhe reduktimin e pajisjeve të peshkimit që mund të shkaktojnë ngërthime fatale.
Në një kohë kur çdo lindje ka rëndësi jetike, mbijetesa e kësaj specieje varet nga përpjekjet e përbashkëta për mbrojtjen e tyre.
