Një akt dhune tronditi zemrën e Mexico City-t, pasi sekretarja personale dhe një nga këshilltarët më të afërt të kryetares së bashkisë Clara Brugada u vranë me armë zjarri nga persona të panjohur që udhëtonin me motoçikletë. Ngjarja ndodhi në lagjen Moderna, një zonë e njohur dhe e populluar e kryeqytetit.
Viktimat, Ximena Guzmán dhe José Muñoz, u qëlluan në mënyrë të drejtpërdrejtë – një akt që Brugada e përshkroi si një “sulm i qëllimshëm dhe i planifikuar”. Deri tani nuk është bërë e ditur nëse sulmi kishte lidhje me ndonjë motiv politik apo ishte pjesë e ndonjë strategjie frikësuese nga krimi i organizuar.
Autoritetet kanë nisur analizimin e pamjeve të kamerave të sigurisë dhe po ndjekin gjurmët për të identifikuar autorët. Në një deklaratë të menjëhershme, Brugada u shpreh se “nuk do të ketë pandëshkueshmëri për këtë krim makabër” dhe premtoi se drejtësia do të vihet në vend.
Shefi i policisë së qytetit, Omar García Harfuch, që vetë ka mbijetuar një atentat në vitin 2020, u shpreh i prekur nga lajmi: “Na vjen shumë keq për humbjen e kolegëve tanë. Nuk do ta lejojmë këtë akt frikacak të kalojë pa ndëshkim.”
Presidentja e vendit, Claudia Sheinbaum, u solidarizua me kryetaren e bashkisë gjatë një deklarate publike, duke theksuar se vendi do të reagojë me forcë për të mos lejuar që dhuna të cënojë qeverisjen dhe sigurinë në qytet.
