Raportet nga Italia thonë se deri në 10 lojtarë të Milanit mund të zhvillojnë ndeshjen e tyre të fundit me fanellën kuqezi në përballjen e ardhshme ndaj Monzës në Serie A, të shtunën në mbrëmje.
Milan-Monza është një nga dy ndeshjet e Serie A në program për të shtunën, pas fitores së Napolit ndaj Cagliarit në stadiumin “Maradona” të premten mbrëma, që i siguroi titullin kampion.
Sergio Conceicao nuk do të jetë në pankinën e Milanit për ndeshjen e fundit të sezonit, pasi është i pezulluar për një ndeshje – dhe kjo pritet të jetë edhe ndeshja e tij e fundit si trajner i kuqezinjve.
Portugezi u emërua pasues i Paulo Fonsecas në fund të vitit 2024, por kontrata e tij përfshin një klauzolë ndërprerjeje, e cila pritet të aktivizohet këtë verë.
Përveç trajnerit, disa lojtarë të skuadrës së parë të Milanit pritet gjithashtu t’i japin lamtumirën San Siros gjatë verës.
Mes tyre janë huazimet Kyle Walker dhe Joao Felix, të cilët pritet të kthehen te klubet e tyre përkatëse, Manchester City dhe Chelsea, pas përfundimit të marrëveshjeve të huazimit këtë verë.
Milan gjithashtu nuk pritet ta aktivizojë opsionin për të blerë përfundimisht Riccardo Sottil nga Fiorentina pas përfundimit të huazimit të tij.
Alessandro Florenzi është pa kontratë në verë dhe gjithashtu pritet të largohet më 30 qershor.
Sipas Calciomercato.com, tre lojtarë – Ruben Loftus-Cheek, Samuel Chukwueze dhe Filippo Terracciano – janë gjithashtu “afër” largimit drejt klubeve të reja përpara hapjes së merkatos verore.
Gjithashtu, tre lojtarë yje mund të largohen gjatë verës për shkak të dështimit të Milanit për t’u kualifikuar në ndonjë garë të UEFA-s për sezonin 2025-26. Ata janë portieri Mike Maignan, mbrojtësi Theo Hernandez dhe mesfushori Tijjani Reijnders, i cili është lidhur me një kalim te Manchester City.
