Një qytet i humbur 2,400-vjeçar është zbuluar nga arkeologët në deltën e Nilit, në Egjipt, duke hedhur dritë mbi një nga vendbanimet më të zhvilluara të periudhës së Vonë Egjiptiane.
Sipas raportimit të tabloidit britanik The Sun, qyteti i lashtë i quajtur Imet ndodhet rreth 10 kilometra në jug të Tanisit dhe besohet të ketë qenë një qendër e rëndësishme fetare dhe ekonomike në shekullin IV para erës sonë.
Zbulimi u bë nga një ekip arkeologësh të udhëhequr nga Dr. Nicky Nielsen nga Universiteti i Manchester-it, në bashkëpunim me Universitetin e Sadat City në Kajro. Ata përdorën teknologji satelitore me rezolucion të lartë për të identifikuar rrënojat, përpara se të nisnin gërmimet në terren.
Një nga gjetjet më të rralla ishte prania e ndërtesave shumëkatëshe, të njohura si “tower houses”, që sipas Dr. Nielsen “tregojnë se Imet ishte një qytet i zhvilluar dhe i populluar dendur me infrastrukturë urbane komplekse”.
Gjithashtu u zbulua një ndërtesë ceremoniale e kushtuar perëndeshës Wadjet, hyjnesha me formë kobre, që në mitologjinë egjiptiane përfaqëson mbrojtjen dhe fuqinë mbretërore të Egjiptit të Poshtëm.
Përveç strukturave madhështore, arkeologët zbuluan edhe objekte të çmuara si ushabti prej faience, stele të Harpokrates, si dhe një sistrum prej bakri të zbukuruar me fytyrën e perëndeshës Hathor, një instrument muzikor që lidhte jetën shpirtërore me jetën e përditshme.
Dr. Nielsen theksoi se qyteti mund të jetë themeluar që në kohën e dinastisë së 18-të, rreth vitit 1550 p.e.s., dhe arriti kulmin gjatë periudhës së Vonë të Egjiptit, pak para se të pushtohej nga Aleksandri i Madh në vitin 332 p.e.s.
Ky zbulim konsiderohet një nga më të rëndësishmit në vitet e fundit në Egjipt dhe pritet të sjellë të dhëna të reja për jetën urbane dhe organizimin administrativ të qytetërimit egjiptian.
