Papa Leoni XIV i ka dërguar një letër falënderuese Kryepiskopit të Kishës Ortodokse të Shqipërisë, Fortlumturisë së tij Joanit, për pjesëmarrjen në Liturgji solemne në Vatikan më 18 maj, atëherë kur Papa i ri u fronëzua në krye të Kishës Katolike.
Papa Leoni shpreh vlerësimin e tij të lartë për figurën e Fortlumturisë së tij Joanit, teska thekson se të dy janë bashkëshërbëtor në vreshtin e Zotit. Më tej Papa fton për një punë të përbashkët mes kishave për pajtimin dhe harmoninë e tyre në të ardhmen, në mes të një bote të përçarë. Papa e mbyll duke e quajtur Imzot Joanin vëlla dhe duke dërguar përqafim në gëzimin e Krishtit.
Letër e Papës Leon XIV drejtuar Kryepiskopit të Tiranës, Durrësit dhe gjithë Shqipërisë, Imzot Joanit:
Fortlumturisë së tij, Joanit,
Kryepiskopit të Tiranës, Durrësit dhe gjithë Shqipërisë
Këto ditë, pas përurimit të shërbesës sime si Peshkop i Romës dhe Pasardhës i Pjetrit, po ju shkruaj për t’ju shprehur mirënjohjen e thellë për afërsinë tuaj vëllazërore dhe për dashurinë që treguat kur morët pjesë, bashkë me delegacionin tuaj të nderuar, në Liturgjinë solemne në Vatikan, të dielën, më 18 maj. Pjesëmarrja juaj më preku thellë, sepse është shenjë treguese e vëllazërisë së krishterë dhe e unitetit të besimit.
Si një bashkëshërbëtor në vreshtin e Zotit, ju kërkoj me dashamirësi të vazhdoni të më mbështesni përmes lutjeve tuaja, që Perëndia i Plotfuqishëm të më forcojë t’i shërbej atij dhe popullit të tij të shenjtë. Ndërsa dëgjojmë së bashku se çfarë i thotë Shpirti i Shenjtë kishave (Zbulesa 2:7), le ta ripërtërijmë përkushtimin tonë për të nxitur unitetin ndërmjet të gjithë të krishterëve, duke iu bindur vullnetit të Zotit Jisu ( Jn. 17:21), dhe të punojmë së bashku në mënyrë më të frytshme për pajtim dhe harmoni në botën tonë të përçarë.
Me këto ndjenja, vëlla i dashur, ju përqafoj ngrohtësisht me gëzimin dhe paqen e Krishtit, Shpëtimtarit tonë.
