Një aksident me pasojë vdekjen është regjistruar mbrëmjen e djeshme në aksin rrugor “Elbasan–Bradashesh”, ku një 62-vjeçar që po lëvizte me biçikletë ka humbur jetën pasi u përplas nga një automjet.
Sipas njoftimit zyrtar të Drejtorisë Vendore të Policisë Elbasan, drejtuesi i automjetit, shtetasi L. B., 28 vjeç, është arrestuar në flagrancë për veprat penale “Drejtimi i automjeteve në mënyrë të parregullt” dhe “Shkelja e rregullave të qarkullimit rrugor”, me pasojë vdekjen.
Nga hetimet paraprake, dyshohet se L. B. drejtonte mjetin në gjendje të dehur kur ka përplasur viktimën, shtetasin Xh. R., 62 vjeç, i cili ndodhej në biçikletë. I moshuari u transportua me urgjencë në spital, por nuk arriti t’i mbijetojë plagëve të marra.
Grupi hetimor po vijon punën për zbardhjen e plotë të rrethanave të ngjarjes, ndërkohë që materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan.
