KPA ka lënë në fuqi shkarkimin nga detyra për prokurorin e Durrësit Ilir Hoxha.
Vendimi u mor nga Trupi gjykues i Kolegjit të Posaçëm të Apelimit, i përbërë nga Sokol Çomo kryesues, Ina Rama relatore, Albana Shtylla, Mimoza Tasi, Natasha Mulaj anëtare, lidhur me ankimin e subjektit të rivlerësimit Ilir Hoxha kundër vendimit të Komisionit të Pavarur të Kualifikimit nr. 734, datë 22.01.2024.
‘Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Lënien në fuqi të vendimit nr. 734, datë 22.01.2024 të Komisionit të Pavarur të Kualifikimit, që i përket subjektit të rivlerësimit Ilir Hoxha. Ky vendim është përfundimtar dhe ka efekt të menjëhershëm’, thuhet në vendim.
