Kreu i entitetit boshnjak të Republikës Serbe, Milorad Dodik, deklaroi sot në Banja Llukë se vendimet e fundit nga Përfaqësuesi i Lartë Christian Schmidt po “shkatërrojnë” Bosnjën dhe Hercegovinën.
“Christian Schmidt po e shkatërron BeH, dhe kjo do të thotë shembja e politikës evropiane në BeH, e cila mbështet parime dhe standarde të tjera, dhe jo arbitraritetin dhe sjelljen jo kushtetuese”, tha Dodik në një konferencë për shtyp.
Ai përsëriti se Schmidt nuk është Përfaqësuesi i Lartë i zgjedhur ligjërisht për Republikën Serbe në Këshillin e Sigurimit të Kombeve të Bashkuara dhe se ai nuk ka të drejtë të marrë vendime, raporton KosovaPress.
Dodik tha se Republika Serbe do të ndalojë të gjitha aktivitetet e BeH-së në rrugën evropiane derisa Bashkimi Evropian të anulojë të gjitha vendimet e Schmidt, dhe se do t’i kërkojë administratës së re amerikane të deklarohet qartë nëse mbështet veprimet e Zyrës së Përfaqësuesit të Lartë dhe Schmidt.
Duke folur për vendimin e Schmidt për të përdorur fitimet e Bankës Qendrore të Bosnjës dhe Hercegovinës për të blerë pajisje për mbajtjen e zgjedhjeve të drejta, Dodik tha se këto pajisje u transferuan në BeH shumë kohë më parë dhe se Schmidt tani po e përfundon këtë punë, duke përdorur disa kompani nga Gjermania ose disa vende të tjera evropiane, në dëm të BeH.
Ai theksoi se sot do të lëshonte një urdhër të përhershëm për policinë e Republikës Serbe për të hetuar Schmidt dhe përfshirjen e tij, siç tha ai, në aktivitete kriminale. Ai deklaroi gjithashtu se nëse Schmidt vendos që prona shtetërore t’i përkasë shtetit të Bosnjës dhe Hercegovinës, Republika Serbe do të merrte një vendim për pavarësinë e saj.
