Klodian Tomorri
Në nëtor të vitit të kaluar, Ermal Dredhës i vunë një minë me sahat në duar. Në protokollin e Bashkisë kishte mbërritur një e ashtuquajtur shprehje interesi për të ndërtuar një central të madh diellor në Kaninë.
Projekti parashikonte të shtrihej në një sipërfaqe 830 hektarë duke përlarë praktikisht të gjithë faqen e Malit të Kaninës, e njohur ndryshe si ekonomia Shashicë-Gumenicë, atje ku qindra banorë të zonës kishin ndërtuar ekonominë e tyre blegtorale.
I vënë përpara presionit të madh që vinte nga Tirana, Ermal Dredha filloi procedurat. Fillimisht duke caktuar një seancë dëgjimore me banorët e Kaninës.
“Janë gati 800 e ca hektarë që ne duam t’i vendosim në një fazë studimi. Pra bëhet fjalë për strategjinë që ka qeveria shqiptare sa i përket edhe pjesës së potencimit të energjisë së rinovueshme. Ideja është që ne e kemi si detyrim ligjor, që kushdo që ka një shprehje interesi të vazhdojmë proçedurat ligjore,” u përpoq të justifikohej kryebashkiaku i Vlorës para banorëve të Kaninës.
Por banorët ishin njëzëri fuqimisht kundër projektit, i cili sipas tyre do të shkatërronte përfundimisht ekonomitë e qindra familjeve që jetojnë kryesisht me blegtori.
“Në atë zonë, ku ju kërkoni të ndërtoni centralin diellor ka më shumë se 7500 krerë bashki dhe dhjetra stane. Ku do shkojnë këta njerëz?” pyetën disa nga banorët.
Paralelisht ata thanë se një pjesë e madhe e tokave pjesë e projektit janë prona private ose në procese gjyqësore për njohjen e titullit të pronësisë, edhe pse kryebashkiaku pretendon se sipas Kadastrës ajo zonë rezulton tokë shtet.
I vënë përballë kundërshtimit të fuqishëm të banorëve, Ermal Dredha u mundua ta zvarrisë sa më shumë shtyrjen përpara të projektit. Por presioni që vinte nga Tirana ishte shumë i lartë.
Vlora në shtetrrethim
Teksa Partia Socialiste ishte mbledhur të festonte 34 vjetorin e saj, në media rrodhën disa pamje të një debati të tensionuar mes Edi Ramës dhe Ermal Dredhës. Në pamjet filmike, kreu i qeverisë dukej qartë teksa i drejtohej me tone shumë të ashpra kryebashkiakut të Vlorës.
Ndonëse motivi i përplasjes u lidh me zjarret në fushën e mbetjeve në Vlorë, me sa duket arsyet ishin më të thella se kaq. Por ky ishte vetëm sinjali i parë, që më vonë do të pasohej nga një fortunë e paprecedentë, e cila e vuri bashkinë e Vlorës në një shtetrrethim qeveritar.
Dy javë pas përvjetorit të PS, Edi Rama zbarkoi vetë në Vlorë. Gjatë një takimi po të tensionuar me Ermal Dredhën ai urdhëroi shkarkimin e të gjithë drejtorëve të bashkisë. Kjo ishte hera e parë në historinë e shtetit shqiptar, kur kryeministri shkarkonte të gjithë ekipin drejtues të një bashkie, e cila më vonë u pasua nga disa bashki të tjera, por jo me intensitetin e Vlorës.
Dhe ndërsa drejtorët e Vlorës dilnin të gjithë kokëulur dhe me bishtin ndër shalë nga Bashkia, ku sapo kishin dhënë dorëheqjet, shumë po përpiqeshin të kuptonin se çfarë qëndronte vërtetë pas bombardimit që Edi Rama i bëri Bashkisë së Vlorës. Por përgjigje nuk kishte.
Megjithatë pazëlli do të dukej më i plotë vetëm dy javë më vonë.
“Kanina” në Këshill Bashkiak
Dredhitë për ta zvarritur sa më shumë projektin e rrëmbimit të tokës në Kaninë nuk po pinin më ujë. Pas dhunimit të Bashkisë së Vlorës nga Edi Rama, me sa duket mesazhi u përcoll qartë. Dy ditë më parë, Ermal Dredha, firmosi projektvendimin për nisjen e procedurës për dhënien me qira për 10 vjet me të drejtë rinovimi të 834 hektarëve në Kaninë. Rastësi shumë e fortë.
Projektvendimi i firmosur është caktuar për votim në mbledhjen e radhës të Këshillit Bashkiak të Vlorës, e cila do të zhvillohet në datën 21 korrik.
“Qëllimi i këtij projektvendimi është miratimi në Këshillin Bashkiak të Vlorës i dhënies në përdorim me afat 10 vjet me të drejtë rinovimi i sipërfaqes kullosore Shashicë Gumenicë, me sipërfaqe totale 834 hektarë, të cilat plotësojnë kushtet e favorshme klimaterike për veprimtari fotovoltaike me qëllim prodhimin e energjisë,” thuhet në relacionin e projekvendimit.
Ndonëse Bashkia e Vlorës e mban të fshehtë emrin e kompanisë që qëndron pas shprehjes së interesit për ndërtimin e parkut diellor, nën zë flitet se pas projektit qëndron një oligark i fuqishëm mediatik nga Tirana, i cili del pronar gjithandej në Jug. Dhe me sa duket tashmë do të bëhet edhe pronari i Kaninës, teksa qeveria po shfaros kështu edhe atë pak blegtori që ka mbetur ende në Shqipëri dhe po përzë edhe ata pak njerëz, që nuk kanë ikur akoma nga sytë këmbët në emigrim.
