Gjatë fjalimit të tij në darkën zyrtare të Çmimit Nobel, shkencëtari britaniko-kanadez Geoffrey Hinton, një nga pionierët e inteligjencës artificiale, dha një mesazh të fuqishëm për përfitimet dhe rreziqet që sjell zhvillimi i shpejtë i kësaj teknologjie. Duke theksuar përparimet dramatike në përdorimin e rrjeteve nervore artificiale — një formë e re e AI që modelon intuitën njerëzore — Hinton tha se kjo teknologji ka potencialin për të rritur ndjeshëm produktivitetin në pothuajse çdo industri.
“Po qe se përfitimet e kësaj produktiviteti ndahen në mënyrë të barabartë, do të jetë një arritje e mrekullueshme për gjithë njerëzimin,” tha Hinton.
Megjithatë, ai paralajmëroi se përfitimet nuk vijnë pa kosto. Sipas tij, AI tashmë ka krijuar ndarje të thella në shoqëri përmes përmbajtjeve që nxisin indinjatën, është përdorur për survejim masiv nga regjime autoritare dhe po shfrytëzohet nga kriminelë kibernetikë për mashtrime. Në një të ardhme të afërt, sipas Hinton, inteligjenca artificiale mund të përdoret për të krijuar viruse të rrezikshëm ose armë vdekjeprurëse që vendosin vetë kë të sulmojnë.
Më shqetësuesi, sipas tij, është kërcënimi afatgjatë ekzistencial që lind kur krijohen entitete dixhitale më inteligjente se vetë njerëzit. “Nuk kemi asnjë ide nëse do të jemi në gjendje të mbajmë kontrollin,” u shpreh Hinton, duke shtuar se nëse këto krijesa zhvillohen nga kompani që udhëhiqen nga fitimi i menjëhershëm, siguria njerëzore nuk do të jetë prioritet.
“Këto rreziqe nuk janë më fantashkencë,” përfundoi ai, duke bërë thirrje për ndërhyrje urgjente nga qeveritë dhe organizatat ndërkombëtare për të parandaluar pasoja të pakthyeshme për njerëzimin.
