Ylli i ri i Barcelonës, Lamine Yamal, ka habitur stafin teknik me ndryshimet fizike të regjistruara gjatë matjeve parasezonale.
Sulmuesi i talentuar, që tashmë është 18 vjeç, është matur me një gjatësi prej 181 centimetrash, plot 10 centimetra më shumë sesa në debutimin e tij me ekipin e parë dy vite më parë.
Kur u ngjit në ekipin e parë, Yamal ishte vetëm 171 cm i gjatë dhe klubi nuk priste që ai të arrinte një gjatësi kaq mbresëlënëse për një sulmues krahu. Zhvillimi i tij fizik është një tjetër dëshmi e rritjes së tij të vazhdueshme si një talent i jashtëzakonshëm.
Në moshën 18-vjeçare, Yamal tashmë konsiderohet si një nga futbollistët më të mirë në botë dhe është kandidat serioz për Topin e Artë 2025, pas një sezoni të jashtëzakonshëm me Barcelonën dhe Spanjën.
Këtë verë, ai ka pasur pushime më të gjata krahasuar me vitin e kaluar, pasi nuk mori pjesë në Kampionatin Botëror të Klubeve me Barcelonën. Kjo i dha mundësi të rikuperohej fizikisht dhe mendërisht pas një sezoni të gjatë.
Yamal e kaloi pjesën e pushimeve në Itali dhe Brazil, ndërsa festimi i ditëlindjes së tij të 18-të më 13 korrik mori shumë vëmendje në rrjetet sociale për shkak të disa detajeve kontroverse.
Tashmë, lojtari që mbush stadiumet me talentin dhe karizmën e tij, është kthyer në stërvitje me Barcelonën dhe ka marrë edhe një përgjegjësi të re, fanellën me numrin 10, që më parë e kanë veshur legjenda si Messi, Ronaldinho dhe Rivaldo.
Me një rritje të dukshme fizike dhe një përvojë gjithnjë e më të pasur, sezoni 2025/26 mund të jetë sezoni i shpërthimit të plotë për Lamine Yamal.
