Ka dështuar për të 51-ën herë konstituimi i Kuvendit të Kosovës ndërsa nga afati 30-ditor, i dhënë nga Gjykata Kushtetuese kanë mbetur vetëm tri ditë.
Kryesuesi i seancës Avni Dehari, e ndërpreu duke thënë se nuk ka kushte për zhvillimin e saj.
Kjo ndodhi pasi deputetja e Partisë Demokratike të Kosovës, Ganimete Musliu, ia largoi mikrofonin.
Paraprakisht, Dehari nuk e lejoi atë të debatonte për çështje të tjera jashtë rendit të ditës.
Kryesuesi i seancës, Avni Dehari, vazhdoi me skenarin e njëjtë duke e hedhur në votim Komisionin për votim të fshehtë, i cili tash e një kohë s’po gjen mbështetjen e partive të tjera përveç partisë së tij, Vetëvendosje, e cila po e dëshiron këtë formë votimi pasi në votim të hapur dështoi që ta bënte Albulena Haxhiun kryeparlamentare.
Seanca dështoi pavarësisht se Vetëvendosje e Albin Kurtit me 48 depuetë dhe Nisma e Fatmir Limajt me tre deputetë iu kanë hyrë negociatave për të gjetur një marrëveshje që do të mund t’i jepte vendit institucionet e munguara që afër pesë muaj pas mbajtjes së zgjedhjeve.
