Një robot i ri transformues, i quajtur Truss Link, i zhvilluar nga studiues të Universitetit të Kolumbias dhe Universitetit të Uashingtonit në SHBA, mund të shënojë një kthesë të madhe në botën e robotikës. I përbërë nga shkopinj magnetikë, ky robot është i aftë të zgjerohet, të transformohet në struktura 3D dhe të riparojë veten duke “ngrënë” pjesë të robotëve të tjerë – një proces që shkencëtarët e kanë quajtur “metabolizëm robotik”.
Truss Link mund të shtojë pjesë të reja nga robotë të afërt për të kompensuar defekte apo për të përmirësuar funksionalitetin e vet. Në një demonstrim, roboti përdori një komponent tjetër si bastun për të rritur shpejtësinë me mbi 50%. Philippe Martin Wyder, studiues në Columbia Engineering, thekson se ky zhvillim përfaqëson një formë të re autonomie: jo vetëm që roboti mendon, por kujdeset për veten edhe fizikisht.
Teknologjia pritet të ketë aplikime të gjera, nga kërkimet nënujore, operacionet e shpëtimit, deri te eksplorimi i hapësirës. “Metabolizmi i robotëve ofron një ndërfaqe dixhitale me botën fizike dhe i lejon IA-në të evoluojë fizikisht, jo vetëm në aftësi njohëse”, u shpreh Wyder.
Ekipi shpreson se kjo teknologji do të ndihmojë në krijimin e robotëve të programueshëm në mënyrë të përgjithshme, të përdorshëm nga çdokush. “Tani kemi teknologjinë që t’i bëjmë robotët vërtet të programueshëm edhe nga njerëz të zakonshëm”, tha Rev Lebaredian i kompanisë Nvidia.
Ky zbulim sjell një perspektivë të re në bashkëpunimin mes inteligjencës artificiale dhe robotikës – një botë ku robotët jo vetëm funksionojnë, por riprodhohen dhe evoluojnë, si organizma të gjallë.
