Një ekspozitë e re në Musée Carnavalet sjell në dritë jetën e Parisit në vitet 1926–1936, duke përdorur për herë të parë inteligjencën artificiale për të digjitalizuar dhe analizuar rreth 8 milionë të dhëna nga regjistrat e popullsisë të asaj kohe, raporton The Guardian.
Projekti, i zhvilluar në bashkëpunim me Qendrën Kombëtare për Kërkime Shkencore të Francës (CNRS), ofron një portret të jashtëzakonshëm të qytetit gjatë “les années folles” (viteve të çmendura), dekada e artë e pas Luftës së Parë Botërore, kur Parisi u bë strehë për artistë, intelektualë dhe emigrantë nga mbarë bota.
Një nga banorët më të famshëm të Parisit në vitin 1926 ishte James Joyce, i cili po punonte mbi “Finnegans Wake” ndërsa jetonte me familjen në një apartament. Fqinjët e tij përfshinin familje nga Siria, Rusia, Egjipti dhe Shtetet e Bashkuara një mozaik kulturor që përfaqësonte shpirtin e kohës.
Regjistrat e digjitalizuar tregojnë se Parisi ishte i populluar kryesisht nga të rinj beqarë dhe se kishte shumë pak fëmijë në qytet. Zbulimi i të dhënave ka nxjerrë në pah edhe personalitete si Josephine Baker, Édith Piaf, Charles Aznavour dhe Kiki de Montparnasse, por fokusi i ekspozitës është tek jeta e zakonshme e parisienëve.
Ekspozita përfshin gjithashtu dokumente, fotografi të papublikuara më parë, regjistrime zanore dhe kronika të kohës. Vizitorët do të kenë mundësinë të kërkojnë në bazën e të dhënave për të afërmit e tyre ose për të zbuluar kush ka jetuar në ndërtesat ku banojnë sot, një udhëtim emocional drejt një Parisi të harruar.
Ekspozita “Njerëzit e Parisit 1926–1936” hapet në tetor 2025, dhe pritet të tërheqë interes të gjerë për qasjen novatore që kombinon historinë me teknologjinë.
