Burime nga Policia italiane bëjnë me dije se i arrestuari ishte subjekt i një urdhër-arresti evropian të lëshuar nga Gjykata e Drejtësisë në Tiranë dhe lëvizte prej kohësh nën identitet të dyshimtë, duke kërkuar leje qëndrimi në Itali.
Arrestohet në Itali një trafikant ndërkombëtar shqiptar, kërkohej në gjithë Evropën. Një shqiptar i shumëkërkuar për trafik ndërkombëtar emigrantësh është arrestuar nga autoritetet italiane në qytetin e Astit.
Kapja e tij erdhi si rezultat i një kontrolli rutinë nga Njësia e Imigracionit pranë Komisariatit të Policisë në Asti. Fillimisht u mendua se ishte thjesht një qytetar i huaj në pritje të dokumenteve, por më pas hetimet zbuluan të shkuarën e tij kriminale.
Sipas autoriteteve, ai është pjesë e një rrjeti të organizuar kriminal që merret me trafikimin e emigrantëve nga Shqipëria drejt vendeve të ndryshme të Evropës, si dhe me lidhje të dyshuara në Mbretërinë e Bashkuar, Kanada dhe Shtetet e Bashkuara.
Gjykata e Apelit e Torinos ka konfirmuar arrestimin dhe ka dhënë miratimin për ekstradimin e tij drejt Shqipërisë. Aktualisht, ai ndodhet në paraburgim në Asti, në pritje të përfundimit të procedurave ligjore për kthimin.
Ky rast hedh dritë mbi rrjetet e paligjshme të trafikimit të qenieve njerëzore dhe sa të rrënjosura janë ato në skenën ndërkombëtare.
