Eksportet kineze u rritën papritur në korrik me 7.2%, ndërsa importet u rritën me 4.1%, pasi kompanitë kineze u përpoqën të shmangnin tarifat e reja të vendosura nga administrata Trump. Rënia e eksporteve direkte drejt SHBA-ve me mbi 20% u kompensua nga rritja e ndjeshme e dërgesave drejt Azisë Juglindore, Afrikës dhe Bashkimit Evropian.
Përballë tarifave shtesë amerikane prej 30%, shumë kompani kineze po përdorin vende të treta për të dërguar mallra në tregjet perëndimore, duke zhvendosur pjesë të prodhimit në vende si Vietnami, Meksika dhe Malajzia.
Ndërkohë, SHBA ka ulur ndjeshëm deficitin tregtar me Kinën, por Pekini vazhdon të eksportojë trefish më shumë mallra drejt SHBA-ve sesa importon.
Për shkak të varësisë së ekonomisë kineze nga eksportet dhe krizës së brendshme në sektorin e pasurive të paluajtshme, Pekini po forcon praninë në tregjet në zhvillim, megjithëse përballet me reagime mbrojtëse nga vende si Indonezia dhe Afrika e Jugut.
