Peticioni qytetar “Ndalo Lojërat Vrasëse” ka arritur mbi 1.4 milion nënshkrime në Bashkimin Evropian, duke kaluar pragun minimal për shqyrtim nga Komisioni Evropian. Nëse nënshkrimet validohen, KE do të vendosë nëse do të propozojë ligje të reja që detyrojnë kompanitë e videolojërave të ruajnë lojërat online edhe pasi ato të ndërpriten.
Sipas përfaqësuesit të iniciativës, Daniel Ondruska, shumë lojëra që varen nga komponentët online bëhen të paluajtshme kur këto shërbime çaktivizohen nga shpërndarësit. Ai solli si shembull lojën e garave “The Crew” të Ubisoft, e cila u lançua në vitin 2014 dhe u bë e padisponueshme në 2024. “E tëra çfarë kërkojmë është një plan që të ruajë thelbin e lojës në mënyrë të arsyeshme për ata që e kanë blerë ligjërisht,” tha Ondruska.
Industria e videolojërave, përmes grupit lobist Video Games Europe, ka argumentuar se ndalimi i lojërave online është një zgjedhje e ligjshme kur ato nuk janë më të qëndrueshme komercialisht, duke theksuar gjithashtu shqetësimet për sigurinë e të dhënave dhe përmbajtjes nëse lojërat ruhen në servera privatë.
Iniciativa u paraqit më 19 qershor 2024 dhe u lançua më 31 korrik të po atij viti, duke arritur objektivin e një milion nënshkrimeve më 4 korrik 2025. Tani ajo është në fazën e verifikimit, një proces që zgjat tre muaj. Pas kësaj, Komisioni Evropian do të ketë gjashtë muaj për të vendosur nëse do të ndërmarrë hapa ligjorë.
