Kur dëgjojmë fjalën “kufij shtetëror”, mendja na shkon menjëherë te rojet e armatosura, qentë e patrullës dhe rrethojat me tela, ku me një shikim të vetëm të kërkohet pasaporta. Por nuk është gjithmonë kështu. Në shumë vende, kufijtë janë shënuar vetëm për simbolikë dhe kalimi i tyre është aq i thjeshtë sa të kalosh nga një lagje në tjetrën.
Në disa pjesë të botës, kufiri është një vijë e bardhë mbi borë, një skulpturë arti, një shirit metalik në dyshemenë e një qendre tregtare apo madje një fushë golfi ku topi mund të udhëtojë nga një vend në tjetrin me një goditje të vetme. Në kufirin mes Gjermanisë dhe Republikës Çeke shtrihet një peizazh malor mahnitës, ndërsa Norvegjia dhe Suedia ndahen nga një shpat i gjatë dhe i pastër bore. Polonia dhe Ukraina kanë zgjedhur një peshk gjigant si simbol të kufirit të tyre, ndërsa midis Finlandës dhe Suedisë mund të luash golf duke kaluar njëkohësisht nga një vend në tjetrin.
Në Amerikën e Jugut, Argjentina, Brazili dhe Paraguai takohen në një pikë ku lumenjtë formojnë një kufi natyror, ndërsa Brazili dhe Uruguai ndahen vetëm nga një trotuar i zakonshëm. Në Amerikën e Veriut, kufiri midis Kanadasë dhe Shteteve të Bashkuara në qytetin Derby Line kalon përmes ndërtesave – madje edhe në mes të bibliotekës – dhe në Europë, një kafene në kufirin mes Holandës dhe Belgjikës lejon klientët të hyjnë në një shtet dhe të dalin në tjetrin pa asnjë pengesë.
Kufiri midis Nepalit dhe Kinës kalon mbi majën e Everestit, ndërsa në qendrën tregtare Eurode, ndarja mes Gjermanisë dhe Holandës shënohet me një shirit të hollë metalik në dysheme. Në veri të Paqësorit, midis Rusisë dhe Shteteve të Bashkuara ndodhen dy ishuj vetëm 35 kilometra larg njëri-tjetrit, por me një diferencë kohore prej plot 21 orësh.
