Prokuroria e Posaçme ka nisur marrjen në pyetje të disa subjekteve lidhur me hetimet për aferën e Eco Park, mes të cilëve ish-kreun e AKUM Alqi Bllakon, aferë e denoncuar që në fillim nga emisioni investigativ PLUG.
Marrja në pyetje e Bllakos është bërë rreth dy javë më parë ku është shoqëruar nga burgu pasi është i akuzuar për aferën e inceneratorëve.
Bllako është pyetur në cilësinë e drejtorit të AKUM, pasi mbante këtë funksion në kohën kur janë kryer procedurat. Dosja po hetohet nga prokurori Klodian Braho, me objekt verifikimin e shkeljeve në aferën ku në 2019 qeveria vendosi të mbyllë Landfillin e Porto-Romanos dhe të ndërtojë Eko Parkun me negocim të drejtëpërdrejtë.
Sipas PD, veprimet e dokumentuara tregojnë për një plan të mirorganizuar korruptiv në bashkëpunim me kompaninë e inceneratorëve.
Sipas kallëzimit, Edi Rama në bashkëpunim me koncesionarin e inceneratorit të Tiranës ‘Integrated Energy bv SPV’, 6 muaj përpara se të hapej procedura tenderuese për ‘Mbylljen e vendepozitimit ekzistues të mbetjeve të ngurta EKO-Park Durrës’ kontraktoi Cassanova Hernandes në cilësinë e projektuesit për këtë investim në Porto Romano.
Më pas në Tetor 2019 drejtuesi i AKUM, Alqi Bllako shpalli tenderin me vlerë 1.9 miliard lekë.
