Një autobus turistik që transportonte më shumë se 50 persona u përmbys në një autostradë në veri të shtetit të Nju Jorkut të premten, duke vrarë të paktën pesë persona dhe duke plagosur dhjetëra të tjerë, thanë autoritetet.
Të paktën një fëmijë ishte midis 5 të vdekurve, sipas oficerit James O’Callaghan, një zëdhënës i Policisë së Shtetit të Nju Jorkut. Ai u tha gazetarëve pranë vendit të ngjarjes se shumica e pasagjerëve ishin aziatikë ose me prejardhje aziatike, përfshirë kinezë, indianë dhe filipinas, sipas Reuters.
Aksidenti ndodhi në autostradën ndërshtetërore 90, pjesë e autostradës shtetërore të New York-ut, në Pembroke, New York, rreth 48 km në lindje të Buffalos, ndërsa autobusi ishte në rrugë nga Ujëvara e Niagarës për në New York City.
Bordi Kombëtar i Sigurisë së Transportit po dërgonte një ekip për të hetuar aksidentin, tha agjencia.
Shumë pasagjerë përfunduan të bllokuar në rrënoja dhe u desh të nxirreshin, ndërsa të tjerë u hodhën nga autobusi kur ai u rrokullis në autostradë përpara se të përfundonte në një hendek përgjatë skajit të rrugës, tha O’Callaghan.
Shoferi, i cili i mbijetoi aksidentit, humbi kontrollin ndërsa autobusi po lëvizte me “shpejtësi të plotë”, tha ai, duke bërë që automjeti të përplasej në rrugën e ndërmjetme dhe më pas të përmbysej. Nuk ishin të përfshira automjete të tjera.
Shoferi po bashkëpunonte me hetuesit, tha O’Callaghan, dhe policia ishte në kontakt me kompaninë e autobusëve, e cila nuk u identifikua publikisht.
Autobusi mbante 51 pasagjerë, pa llogaritur shoferin, dhe çdo person në bord pësoi ndonjë lloj lëndimi, tha O’Callaghan.
Një deklaratë online nga policia shtetërore tha se u konfirmuan “disa viktima”. Guvernatorja e Nju Jorkut, Kathy Hochul, tha në platformën sociale X se policia kishte konfirmuar se “pesë jetë u humbën tragjikisht”.
Pas aksidentit, autoritetet mbyllën autostradën në të dyja drejtimet, duke shkaktuar vonesa të mëdha në trafik në fillim të një prej fundjavave të fundit të sezonit të pushimeve verore.
