Një grua e dytë ka paraqitur akuza për ngacmim seksual ndaj kryeprokurorit të Gjykatës Ndërkombëtare Penale (ICC), Karim Khan, sipas një hetimi të nisur nga një organ mbikëqyrës i OKB-së.
Ajo pretendon se gjatë kohës kur punonte si praktikante për Khan në vitin 2009, ai e ka ngacmuar vazhdimisht dhe ka abuzuar me pozitën e tij, duke ushtruar presion për marrëdhënie seksuale.
Khan, i cili i mohon kategorikisht akuzat, është tërhequr përkohësisht nga drejtimi i departamentit të hetimeve në ICC, ndërsa vijon procesi hetimor edhe për një çështje tjetër të ngjashme, të ngritur nga një ish-punonjëse e gjykatës.
Të dyja gratë kanë deklaruar se ai i ftonte të punonin në shtëpinë e tij, ku përpiqej t’i afronte fizikisht dhe t’i bindte për marrëdhënie intime.
Avokatët e Khan thonë se akuzat janë “tërësisht të pavërteta” dhe se ai është viktimë e një fushate për ta diskredituar, veçanërisht pas urdhrave të arrestit të lëshuara ndaj Vladimir Putinit dhe Benjamin Netanyahut.
Pas përfundimit të hetimit nga OKB, një panel ekspertësh gjyqësorë do të vendosë nëse Khan ka kryer shkelje serioze, çka mund të çojë në një votim të 125 shteteve anëtare për shkarkimin e tij.
Ndërkohë, dëshmitë e reja nga dy gratë kanë ngritur dyshime serioze mbi sjelljen e kryeprokurorit, duke e vënë ICC-në përballë një krize të paprecedentë besueshmërie.
