Florida ka arritur një rekord të zi këtë vit, duke kryer njëmbëdhjetë ekzekutime, më shumë se çdo vit tjetër në periudhën e fundit.
I fundit që u ekzekutua ishte Curtis Windom, 59 vjeç, i dënuar për një vrasje të trefishtë në vitin 1992. Ai u ekzekutua me injeksion vdekjeje në Burgun Shtetëror të Floridës, pasi Gjykata Supreme e SHBA-së hodhi poshtë ankesën e tij të fundit, raporton CBS News.
Windom ishte dënuar për vrasjen e të dashurës së tij Valerie Davis, nënës së saj Mary Lubin dhe Johnnie Leet, një person për të cilin ai pretendonte se i kishte borxh. Përpjekjet e avokatëve të tij për të ndaluar ekzekutimin u fokusuan në pretendimet për përfaqësim të papërshtatshëm gjatë procesit gjyqësor, duke argumentuar se avokati i tij i asaj kohe nuk kishte kualifikimet e nevojshme për çështje me dënim me vdekje, duke shkelur kështu të drejtën e garantuar nga Amendamenti i gjashtë i Kushtetutës amerikane.
Urdhri për ekzekutimin e Windomit u firmos më 29 korrik nga guvernatori i Floridës, Ron DeSantis. Ai po ashtu ka firmosur edhe urdhrin për ekzekutimin e dymbëdhjetë, i cili pritet të kryhet më 17 shtator. Ky i fundit është David Pittman, i dënuar për vrasjen e tre anëtarëve të familjes së ish-gruas së tij në vitin 1990.
Rekordi i mëparshëm i numrit të ekzekutimeve në Florida për një vit ishte tetë, regjistruar në vitet 1984 dhe 2014. Ky rekord i ri përfshin periudhën pas rikthimit të dënimit me vdekje në vitin 1976, katër vjet pasi Gjykata Supreme e SHBA-së e kishte pezulluar përkohësisht.
Përveç Curtis Windomit, gjatë këtij viti janë ekzekutuar edhe dhjetë persona të tjerë në Florida, përfshirë Kayle Bates, Edward Zakrzewski, Michael Bell, Thomas Gudinas, Anthony Wainëright, Glen Rogers, Jeffrey Hutchinson, Michael Tanzi, Edward James dhe James Ford.
