Kreu i qeverisë Edi Rama prej javësh ka vënë në shënjestër gjyqtarë që i dalin kundër propagandës së tij.
Sapo një vendim gjykate, nuk i shkon përshtat fushatës së tij propagandistike, Edi Rama e sulmon në rrjetet sociale dhe më pas ja lë në dorë lukunisë mediatike dhe komentuesve të tij të call centerave, për të sulmuar dhe poshtëruar zyrtarët e gjyqësorit.
Gjyqtarët kanë një institucion i cili duhet ti mbrojë, që është Këshilli i Lartë Gjyqësor, por edhe si në reagime të tjera të tyre, drejtuesit e KLGJ-së, e kanë treguar edhe herë se i janë nënshtruar Edi Ramës dhe nuk kanë asnjë lloj pavarësie.
Pasditen e sotme KLGJ ka reaguar ndaj deklaratave të Ramës. Reagoi me një deklaratë të poshtëruese, të paqartë dhe, mbi të gjitha, pa guxuar ti përmendin emrin e Edi Ramës, i cili ka dalë publikisht kundër gjyqtarëve duke u publikuar emrat dhe fotot.
Në deklaratën e saj KLGJ flet për ‘subjekte publike apo private’, që duket se është bërë vetëm për të ‘larë gojën’, e jo për të mbrojtur ndokënd, e duke mos i shërbyer aspak të vërtetës.
Në fakt nuk ka asnjë ‘subjekt’ tjetër që ka sulmuar gjyqtarët përveç Edi Ramës. Kjo gjuhë me një deklaratë qesharake, është tregues i një institucioni që ka frikë dhe nuk ka më asnjë pavarësi për të mbrojtur sistemin, siç duhej të ndodhte.
Duke mos i përmendur emrin Edi Ramës, KLGJ ka dështuar në misionin e vet, atë të mbrojtjes së gjyqtarëve.
Deklarata e KLGJ:
Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cenojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor.
Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm.
Këshilli ju bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës. E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse.
KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.
Në një shtet të së drejtës – i cili sot është më pranë se kurrë aspiratës për t’u bërë pjesë e Bashkimit Evropian – vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut.
