Një incident i rrezikshëm është regjistruar në qytetin e Tepelenës, ku është rrëzuar ballkoni i një banese. Fatmirësisht, nuk ka pasur të lënduar, pasi ballkoni është penguar nga një shtratore rrushi e vendosur në katin e parë, duke shmangur një tragjedi të mundshme.
Pallati në fjalë është pjesë e projektit të fasadave, i cili synon rehabilitimin estetik të godinave të vjetra, por ngjarja e sotme ka ngritur pikëpyetje serioze mbi sigurinë e strukturës. Sipas banorëve, edhe ballkoni i katit të katërt paraqet rrezik shembjeje, duke alarmuar komunitetin lokal.
Në vendngjarje ndodhet ekipi i zjarrfikësve, i cili ka rrethuar zonën për të parandaluar lëvizjen e qytetarëve dhe për të vlerësuar gjendjen e strukturës së ndërtesës.
Autoritetet lokale dhe institucionet përgjegjëse pritet të reagojnë në vijim për të sqaruar shkaqet e shembjes dhe masat që do të merren për parandalimin e ngjarjeve të ngjashme.
