Një periudhë e re musonesh e shoqëruar nga përmbytje masive ka lënë të vdekur 16 persona dhe dhjetëra të tjerë janë lënduar në provincën verilindore Punjab të Pakistanit gjatë 24 orëve të fundit, ndërsa ekipet e shpëtimit mbetën të angazhuara në evakuimin e mijëra personave të prekur, raportuan zyrtarët sot.
Të paktën 13 viktima u raportuan nga kryeqyteti i provincës Lahore, distriktet Nankana Sahib, Mandi Bahauddin, Gujranwala dhe Dear Ghazi Khan, duke e çuar numrin e të vdekurve në 46 gjatë katër ditëve të fundit, tha departamenti i shpëtimit provincial në një deklaratë.
Përmbytjet masive shkatërruan të paktën shtatë diga në distriktin Bahawalpur, duke përmbytur dhjetëra fshatra dhe të mbjella në vend.
Ministrja e Lartë e Punjabit, Marriyum Aurangzeb, u tha gazetarëve në Lahore se numri i njerëzve të prekur nga përmbytjet është rritur në mbi 2 milionë, ndërsa më shumë se 700 mijë njerëz janë evakuuar deri më tani në të gjithë provincën, raporton kp.
Departamenti Meteorologjik i Pakistanit ka parashikuar më shumë shira gjatë tri ditëve të ardhshme, gjë që mund të përkeqësojë përmbytjet tashmë në rritje.
Për herë të parë në historinë 78-vjeçare të vendit tre lumenjtë lindorë Chenab, Ravi, Sutlej kanë dalë nga shtrati njëkohësisht.
