Botët gjigante jashtë Sistemit Diellor mund të mbajnë çelësin për të kuptuar një nga misteret më të mëdha të universit – materies së errët.
Sipas një studimi të ri, një model i caktuar i materies së errët mund të çojë në akumulimin e saj në bërthamat e planetëve gjigantë, gjë që përfundimisht do të rezultonte në shembjen e tyre në vrima të zeza të vogla që do të gëlltisnin planetin e tyre, shkruan Science Alert, transmeton KosovaPress.
Zbulimi i një objekti të tillë me masë planetare do të konfirmonte ekzistencën e një forme të rëndë të materies së errët që nuk shkatërron veten, duke hapur një kapitull krejtësisht të ri në astrofizikë.
Astrofizikani Mehrdad Phoroutan-Mehr nga Universitetit të Kalifornisë Riverside, thotë se kjo vrimë e zezë mund të rritet dhe të gëlltisë të gjithë planetin, duke e shndërruar atë në një vrimë të zezë me të njëjtën masë si planeti origjinal.
“Nëse grimcat e materies së errët janë mjaftueshëm të rënda dhe nuk asgjësohen, ato përfundimisht mund të shemben në një vrimë të zezë të vogël. Ky rezultat është i mundur vetëm sipas modelit të materies së errët super të rëndë që nuk asgjëson,” tha ai.
Materia e errët është një substancë e padukshme që vlerësohet të përbëjë rreth 85 për qind të të gjithë materies në univers.
Edhe pse nuk mund ta zbulojmë drejtpërdrejt, ne nxjerrim përfundimin për ekzistencën e saj bazuar në efektet gravitacionale që ka në materien e dukshme.
Shkencëtarët ende nuk e dinë saktësisht se çfarë është materia e errët, por ka disa teori kryesore që përshkruajnë sjelljen e saj.
Studimi sugjeron që materia e errët e rëndë, grimcat e së cilës nuk asgjësojnë njëra-tjetrën, mund të bllokohet nga graviteti i botëve gjigante.
Me kalimin e kohës, këto grimca do të humbnin energji dhe do të fundoseshin drejt bërthamave të planetëve, ku do të përqendroheshin derisa të shembeshin nën gravitetin e tyre, duke formuar vrima të zeza të vogla.
“Në ekzoplanetët me përbërje të gazit me madhësi, temperatura dhe dendësi të ndryshme, vrimat e zeza mund të formohen në shkallë kohore të vëzhguara, duke gjeneruar potencialisht edhe vrima të zeza të shumëfishta gjatë jetëgjatësisë së një ekzoplaneti.
Këto rezultate tregojnë se si studimet e ekzoplanetëve mund të përdoren për të kërkuar grimca supermasive të materies së errët, veçanërisht në rajonet që mendohet të jenë të pasura me materie të errët, siç është qendra galaktike e Rrugës sonë të Qumështit,” tha astrofizikani Mehrdad Phoroutan-Mehr.
Teknologjia e vëzhgimit të hapësirës po përparon vazhdimisht, kështu që nuk është e pa konceptueshme që një ditë të zhvillohen instrumente të aftë për të zbuluar një vrimë të zezë me masë planetare.
“Nëse astronomët do të zbulonin një popullatë vrimash të zeza me madhësinë e planetit, kjo mund të ofronte prova të forta në favor të modelit të materies së errët super të rëndë jo-asgjësuese”, përfundon Phoroutan-Mehr.
