Rezervat hidroenergjetike në Greqi dhe Bullgari janë në nivelin më të ulët të dekadës, me rënien që i atribuohet thatësirës së zgjatur dhe reshjeve të kufizuara. Situata po ndikon në prodhimin e energjisë elektrike, pasi kapaciteti hidroenergjetik në rajonin e Evropës Juglindore vlerësohet të bjerë me rreth 10% deri në vitin 2025.
Ulja e energjisë hidroelektrike të disponueshme po vepron si një faktor mbështetës i çmimeve në tregun me shumicë. Sipas vlerësimeve të cituara nga Montel, pritet një humbje energjie prej 1.1 GW në tre javët e ardhshme. Megjithëse një rikuperim i pjesshëm i rezervave të ujit u vu re në gusht, pamja në të dy vendet mbetet e dobët krahasuar me vitet e kaluara.
Shqipëria
Shqipëria, e cila mbështetet shumë në energjinë hidroelektrike për bilancin e saj të energjisë, përballet me presione të ngjashme. Të dhënat zyrtare nga Korporata Elektroenergjetike Shqiptare tregojnë se aktualisht rezerva hidrike e vendit ka rënë në 563 giga, ose gati 25 për qind më pak nga mesatarja shumëvjeçare e kësaj periudhe.
Rezerva hidrike
Aktualisht një pjesë e rënies së prodhimit hidro po kompesohet nga rritja e energjisë diellore. Sipas të dhënave nga Instituti i Statistikave, për periudhën prill – qershor centralet fotovoltaike gjeneruan 288.034 mwh energji, duke përbërë 16.4% të energjisë totale të burimeve vendase, kur në 3-mujorin e dytë të vitit 2024, energjia fotovoltaike përbënte vetëm 6.8% të totalit.
Megjithatë rritja e prodhimit nga burimet diellore nuk mjafton për të kompesuar plotësisht rënien e prodhimit hidrik. Kjo e ka detyruar KESH, që të importojë sasi të madhe energjie këtë vit, ndërkohë që paralelisht Korporata ka vënë në punë edhe dy anijet e ankoruara në Gjirin e Vlorës.
Sipas të dhënave nga KESH, deri më tani dy Tigrat e Vlorës kanë prodhuar mbi 60 mijë megavat energji elektrike për këtë vit, ndërkohë që pak ditë më parë, Korporata njoftoi hapjen e një tenderi për blerjen e 15 mijë tonëve karburant, i cili do të përdoret për prodhimin e energjisë nga dy termocentralet lundruese./kapital
