Tre vëllezër nga Edinburgu kanë arritur një rekord të ri duke lundruar me rrema pa ndalim dhe pa ndihmë përgjatë Oqeanit Paqësor, për thuajse 140 ditë në det.
Jamie, Ewan dhe Lachlan Maclean u rezistuan stuhive tropikale që i detyruan të bënin devijime të gjata në udhëtimin e tyre prej 14,484 kilometrash nga Peruja në Australi.
Gjatë një stuhie, varka e tyre u përmbys nga një dallgë e madhe para se të hipnin sërish në të.
Vëllezërit tanimë janë takuar me familjen dhe miqtë në Cairns, Australi dhe thanë se mezi po prisnin të hanin një picë dhe të flinin.
“Është ende pak surreale, do të na duhet pak që këmbët të na prekin tokën, por çfarë pritjeje të mrekullueshme patëm në Cairns”, tha Ewan për BBC.
Jamie tha se lundrimi ishte fizikisht dhe mendërisht “i vështirë”, duke shtuar: “Së bashku ne formojmë një ekip shumë të mirë dhe bashkë ia dolëm ta tejkalojmë këtë sfidë të madhe.”
Treshja skoceze ia ka dalë të mposhtë rekordin e 162 ditëve të plota të lundërtarit rus Fyodor Konyukhov në 2014. Koha e tyre ishte 139 ditë, 5 orë dhe 52 minuta.
Ata kanë arritur të mbledhin mbi 700 mijë paund nga objektivi i tyre prej 1 milionë paundësh për projektet e ujit të pastër në Madagascar dhe shpresonin që ta mbyllinin udhëtimin brenda një kohe më të shkurtër.
Por moti i keq ndryshoi planet e pjesës së mbetur të udhëtimit. Në mënyrë që ta vazhdonin udhëtimin pa ndihmë, ata s’mund të ndalonin në ndonjë ishull për t’u furnizuar apo të pranonin ndihmë nga anijet që kalonin.
Vëllezërit kishin marrë me vete 500 kilogramë ushqim të ngrirë dhe 75 kilogramë drithëra. Ata kishin mjaftueshëm furnizime për 150 ditë, por nisën të raciononin ushqimin në javët e fundit në rast se do të kishin vonesa për të mbërritur në Australi.
