Të paktën 60 persona kanë humbur jetën në një sulm brutal të ndërmarrë nga militantë xhihadistë në verilindje të Nigerisë. Ngjarja ka ndodhur në qytetin Darul Jama, pranë kufirit me Kamerunin, një zonë që strehon edhe një bazë ushtarake.
Sipas burimeve të sigurisë, agresorët kanë mbërritur në qytet me motoçikleta, kanë hapur zjarr me armë automatike dhe më pas kanë djegur disa shtëpi. Ndër viktimat raportohet të jenë edhe pesë ushtarë nigerianë.
Megjithëse dhuna e grupeve xhihadiste ka shënuar një rënie krahasuar me periudhën më të përgjakshme të përplasjes me Boko Haram midis viteve 2013 dhe 2015, sulmet vijojnë. Më aktivë janë militantët e Shtetit Islamik të Afrikës Perëndimore (ISWAP), një grup i shkëputur nga Boko Haram, i cili godet kryesisht zonat rurale në verilindje të vendit.
Autoritetet nigeriane ende nuk kanë dhënë një bilanc zyrtar për ngjarjen, ndërsa operacionet e kërkimit dhe hetimet janë në vijim.
