Një gjykatë apeli në New York konfirmoi dënimin prej 83.3 milionë dollarësh ndaj Donald Trump për shpifje ndaj gazetares dhe autores E. Jean Carroll, e cila e kishte akuzuar atë për përdhunim në vitet 1990.
Ky vendim pason një tjetër gjyq civil, ku Trump u shpall përgjegjës për sulm seksual dhe u urdhërua të paguante 5 milionë dollarë në maj të vitit 2023.
Juria në janar 2024 vendosi që Trump kishte shpifur në mënyrë të përsëritur dhe me qëllim ndaj Carroll, duke i shkaktuar asaj dëme të konsiderueshme morale dhe profesionale.
65 milionë dollarë nga kjo shumë janë dëmshpërblime ndëshkuese, me qëllim që ta ndalojnë atë të sulmojë sërish viktimën.
Trump, i cili në atë kohë ishte në fushatë për t’u rikthyer në Shtëpinë e Bardhë, e quajti vendimin “qesharak” dhe premtoi apelim.
Megjithatë, gjykata vlerësoi se dënimi financiar ishte “i arsyeshëm përballë fakteve tronditëse të këtij rasti”, duke shtuar se Trump “nuk do të ndalonte shpifjet ndaj Carroll nëse nuk përballej me një ndëshkim të rëndë financiar”.
E. Jean Carroll, 81 vjeç, u bë një nga zërat më të fortë publikë që e akuzoi ish-presidentin për sjellje seksuale të papranueshme.
Trump, përmes rrjetit të tij Truth Social, e kishte quajtur atë një “histori të rreme”, “të çmendur” dhe “manipuluese që kërkon para”, krahasime që u konsideruan shpifëse nga gjykata.
