Personi i akuzuar për tentativën për të vrarë Presidentin Donald Trump vitin e kaluar në fushën e tij të golfit në Florida ka shkarkuar avokatët e tij dhe ka vendosur të mbrohet vetëm në gjyqin e tij që filloi sot.
Ryan Routh, 59 vjeç, përballet me burgim të përjetshëm për tentativën e vrasjes së një kandidati presidencial. Prokurorët thonë se ai u fsheh me një pushkë në Klubin Ndërkombëtar të Golfit Trump në ëest Palm Beach me qëllim që të qëllonte Donald Trump vetëm disa javë para zgjedhjeve presidenciale të vitit 2024.
Një agjent i Shërbimit Sekret e vuri re të fshehur në një pemishte dhe hapi zjarr, duke e detyruar të ikte pa qëlluar asnjë plumb.
Ky ishte atentati i dytë ndaj jetës së Trump brenda dy muajsh. Në të parin, personi i armatosur u vra në vend nga policia.
Routh nuk pranon fajësinë për të gjitha akuzat. Gjyqi i tij në gjykatën federale të Fort Pierce filloi sot me përzgjedhjen e jurisë.
Routh, një ish-kontraktor çatish me një histori të avokimit donkishotesk për demokracitë “e brishta” si Ukraina dhe Tajvani, ka të ngjarë ta kthejë gjyqin e tij në një forum për të paraqitur pikëpamjet e tij. Sot, gjyqtarja Eileen Cannon hodhi poshtë disa nga pyetjet që i pandehuri u bëri anëtarëve të ardhshëm të jurisë si “të parëndësishme për procedurat”, pasi ato përfshinin pyetje në lidhje me aktivistët pro-palestinezë në kampus dhe pushtimin amerikan të Grenlandës.
Routh ka thënë gjithashtu se votoi për Trump në zgjedhjet e vitit 2016, por më pas u zhgënjye me presidentin republikan.
