Princ Harry është larguar nga Clarence House pas një takimi privat me babanë e tij, Mbretin Charles III, në atë që konsiderohet si një përpjekje për pajtim mes tyre.
Takimi i shumëpritur zgjati vetëm 55 minuta, por shënon takimin e parë ballë për ballë midis tyre në më shumë se një vit e gjysmë.
Duka i Sussex-it u pa duke mbërritur në rezidencën mbretërore rreth orës 17:20, pasi më herët kishte vizituar Qendrën e Studimeve të Lëndimeve nga Shpërthimet në Imperial College London.
Mbret Charles kishte arritur në Clarence House rreth orës 16:00, menjëherë pas kthimit nga një qëndrim në Balmoral.
Vizita e Harry-t vjen në ditën e tretë të një qëndrimi të rrallë katër-ditor në Mbretëri, gjatë të cilit po zhvillon takime me organizata bamirësie dhe projekte sociale.
Deri më sot, ai nuk ishte takuar me as Mbretin e as me vëllain e tij, Princ William.
Gjatë kësaj vizite, Princ Harry vazhdon të jetë aktiv në fushatën e tij për mbështetjen e viktimave të luftës dhe katastrofave natyrore.
Sot, ai u prit ngrohtësisht në Qendrën për Studime mbi Lëndimet nga Shpërthimet, ku u përqafua nga ish-kapiteni i Ushtrisë Britanike, David Henson – një mik i vjetër dhe veteran që humbi të dyja këmbët në Afganistan.
Harry u shpreh se qendra është një model për kërkimin mjekësor dhe shprehu shqetësimin e thellë për situatën në Gaza, duke thënë se:
“Gaza ka tani densitetin më të lartë të fëmijëve të amputuar në botë dhe në histori. Asnjë organizatë nuk mund ta përballojë këtë e vetme.”
Përmes fondacionit të tij, ai ka dhuruar 500,000 dollarë (rreth 370,000 £) për projekte që ndihmojnë fëmijët e lënduar në Gaza dhe Ukrainë, përfshirë evakuimet dhe zhvillimin e protezave në bashkëpunim me OBSH.
Më vonë gjatë ditës, Harry do të marrë pjesë në një reception të lidhur me Invictus Games, një turne ndërkombëtar që ai e themeloi në vitin 2014 për të mbështetur veteranët dhe ushtarët e plagosur.
Kjo vizitë në Britani ka përfshirë gjithashtu pjesëmarrjen në WellChild Awards si dhe një vizitë në Community Recording Studio në Nottingham, ku ai njoftoi një donacion personal prej 1.1 milionë paund për projektet e fëmijëve në nevojë.
Ndërsa raportet mes Princ Harry-t dhe familjes mbretërore mbeten të tensionuara, takimi me Mbretin – sado i shkurtër – mbart një domethënie të fortë simbolike në përpjekjet për ndërtimin e një marrëdhënieje më të shëndetshme mes babait dhe djalit.
