Të paktën 50 refugjatë sudanezë humbin jetën pas djegies së një anijeje pranë brigjeve të Libisë.
Organizata Ndërkombëtare për Migracionin (IOM) bëri të ditur të hënën se një tragjedi e rëndë ka ndodhur pranë brigjeve të Libisë, ku të paktën 50 refugjatë sudanezë kanë humbur jetën pasi anija me të cilën po udhëtonin u përfshi nga flakët.
Në bordin e anijes ndodheshin rreth 75 persona, shumica prej tyre sudanezë që po përpiqeshin të arratiseshin nga varfëria dhe konfliktet e brendshme në vendin e tyre, me shpresën për një jetë më të mirë në Evropë.
Ngjarja ndodhi të dielën, por IOM e konfirmoi rastin një ditë më vonë, duke shtuar se ekipet e saj në terren kanë ofruar ndihmë mjekësore dhe mbështetje humanitare për të mbijetuarit. Shkaqet e zjarrit në anije ende nuk janë të qarta, por incidenti vjen si një tjetër kujtesë e ashpër për rrezikun dhe pasigurinë që migrantët përballen në rrugët detare drejt Evropës, raporton jp.
Që nga rrëzimi i regjimit të Moamer Gadafit në vitin 2011, Libia është kthyer në një nga rrugët kryesore të tranzitit për migrantët që synojnë të kalojnë Mesdheun dhe të mbërrijnë në brigjet jugore të Evropës, kryesisht në Itali. Mungesa e stabilitetit politik dhe prania e grupeve të armatosura e kanë bërë Libinë një vend jashtëzakonisht të rrezikshëm për migrantët, të cilët shpesh përballen me abuzime, trafikim njerëzor dhe kushte çnjerëzore në kampet e paraburgimit.
Sipas të dhënave më të fundit të IOM-it, gjatë këtij viti, në territorin libian kanë qëndruar mbi 860 mijë migrantë që vijnë nga 44 shtete të ndryshme. Shumë prej tyre ndodhen në një situatë të pasigurt, të mbështetur në ndihma ndërkombëtare dhe në mëshirën e kontrabandistëve.
Organizatat humanitare vazhdojnë të apelojnë për zgjidhje të qëndrueshme, për respektimin e të drejtave të njeriut të migrantëve dhe për hapjen e rrugëve të sigurta dhe ligjore për azil.
Pa veprime të bashkërenduara ndërkombëtare, migrantët do të vazhdojnë të vënë jetën në rrezik për një të ardhme që shpesh mbetet një premtim që nuk po mbahet.
