Një natë historike për futbollin azerbajxhanas. Qarabag arriti fitoren e parë të tij në historinë e UEFA Champions League, duke mposhtur Benficën 3:2 në “Estadio da Luz” të Lisbonës, një nga surprizat më të mëdha të javës europiane.
Portugezët nisën vrullshëm, duke kaluar në avantazh 2-0 që në minutën e 16-të me golat e Barrenechea dhe Pavlidis, por Qarabag reagoi me karakter. Andrade ngushtoi shifrat në minutën e 30-të, ndërsa në pjesën e dytë ishte Duran që barazoi në të 48-ën.
Benfica sulmoi, por pa saktësi, duke lënë hapësirë për goditjen vendimtare: në minutën e 86-të, Kashchuk shënoi golin e fitores, duke nisur festën e madhe për miqtë.
Skuadra e udhëhequr prej vitit 2008 nga trajneri Gurban Gurbanov, ish-sulmues i kombëtares së Azerbajxhanit, mbështetet kryesisht te lojtarët vendas, të përforcuar me disa të huaj cilësorë si Andrade, Duran e Kashchuk, heronjtë e mbrëmjes së Lisbonës.
Pasi eliminoi Shelbourne, Shkëndijën dhe Ferencvaros në turet kualifikuese, Qarabag ka treguar se tashmë ka fituar përmasat e një skuadre europiane. Pas debutimit historik në fazën e grupeve më 2017-18, kampionët e Azerbajxhanit shtojnë një tjetër faqe të lavdishme: fitoren e parë absolute në Champions League
