Anëtari i djathtë i këshillit bashkiak të Vlorës, Gjergji Nika, ka denoncuar një skandal të rëndë në Bashkinë e Vlorës, duke e cilësuar vendosjen e një kryetari të komanduar si një skenar politik e ekonomik për të kontrolluar tenderat, pronat publike dhe buxhetin e qytetit.
Sipas Nikës, nënkryetari i emëruar vetëm pesë ditë më parë pritet të marrë drejtimin e bashkisë, në kundërshtim me ligjin që parashikon zhvillimin e zgjedhjeve brenda 45 ditësh. Ai akuzoi këshilltarët e majtë se po mbështesin këtë proces të paligjshëm, duke degraduar moralin dhe transparencën politike.
“Në Bashkinë e Vlorës po ndodh një skandal i pashembullt: në detyrën e kryetarit të komanduar ditën e Henë do të vendoset një nënkryetar i emëruar vetëm 5 ditë më parë. Ky veprim nuk është vetëm i paligjshëm, por një skenar i qartë politik dhe ekonomik për të firmosur dhe kontrolluar tenderat, pronat publike dhe buxhetin e qytetit.
Ligji është i qartë: brenda 45 ditësh duhet të zhvillohen zgjedhje që qytetarët të zgjedhin kryetarin e tyre. Çdo manovër tjetër është shkelje e hapur e ligjit dhe e demokracisë vendore.
Por ajo që e bën edhe më të rëndë këtë situatë është fakti se këshilltarët e majtë do të vazhdojnë të votojnë dhe të gabojnë me vendimet e tyre, ashtu siç kanë gabuar për 2 vite me radhë. Çdo dorë e ngritur për të mbështetur këtë shkelje është bashkëfajësi e plotë në degradimin e ligjshmërisë, transparencës dhe moralit politik të tyre.
Dega lokale e Partisë Socialiste dhe këshilltarët e saj nuk po përfaqësojnë qytetarët, por interesa të ngushta politike e ekonomike.
Vlora ka nevojë për zgjedhje të lira dhe një kryetar të djathtë, të zgjedhur nga qytetarët, që të sjellë transparencë, moral dhe zhvillim për qytetin.” – shkruan Nika.
