Edi Rama e ka çuar edhe më tej hakmarrjen e tij ndaj Erion Veliajt.
Ditën e sotme, asambleja e Shoqatës Kombëtare të Bashkive ka vendosur të shkarkojë Veliajn nga kryetar i saj, dhe ka zgjedhur kryetaren e Bashkisë së Durrësit, Emiriana Sako si zëvendësuese.
Shumica e drejtuesve të bashkive të majta i votuan ndryshime pa bërë asnjë debat.
Posti i kryetarit të Shoqatës është mbajtur prej vitesh nga Veliaj, në cilësinë e kreut të Bashkisë së Tiranës.
Shkarkimi i Veliajt nga drejtimi i Shoqatës Kombëtare të Bashkive, vjen 3 ditë para mbledhjes së Këshillit Bashkiak të Tiranës, i cili ka në rend dite ka shkarkimin e Erion Veliaj nga detyra e kryetarit të bashkisë së Tiranës.
Vendimi për largimin e Erion Veliajt vjen në një kohë që për kryebashkiakun e Tiranës është inicuar një procedurë shkarkimi në Këshillin Bashkiak nga anëtarët socialist, me argumentin që prej më shumë se 3 muajsh ai nuk është paraqitur në zyrë për të kryer detyrat si i pari i qytetit.
Mbledhja e këshillit bashkiak për shkarkimin e Veliajt është planifikuar më datë 23 shtator dhe më pas procedura kalon në Këshillin e Ministrave, që pasi shkarkon kryebashkiakun njofton presidentin, i cili dekreton datën e zgjedhjeve të parakohshme jo më larg se 45 ditë nga momenti i njoftimit.
Asambleja e Shoqatës në shumicën e saj dërrmuese përbëhet nga kryetarë të bashkive të Majta, ndërsa pjesëmarrës në të ishin edhe kryebashkiakët e opozitës.
