Pas më shumë se tre dekadave në Departamentin e Shtetit, diplomati amerikan Dave Kostelancik ka shpallur përfundimin e detyrës së tij, duke e cilësuar këtë udhëtim profesional një nder dhe privilegj të madh.
Në një mesazh lamtumire, Kostelancik kujtoi periudhat e rëndësishme të shërbimit të tij diplomatik, duke nisur nga Turqia dhe Iraku Verior pas Luftës së Gjirit, tek hapja e Ambasadës së re amerikane në Shqipëri ku ishte diplomati i parë i akredituar, shërbimi në Rusi si dhe detyrat në NATO e OSBE.
Po ashtu, ai ka mbajtur pozicione të larta në Washington, mes të cilave në Këshillin e Sigurisë Kombëtare, në Byroja e Çështjeve Evropiane dhe atë të Luftës kundër Terrorizmit.
Mirëpo, në Shqipëri, ai nuk e pati fatin të përmbyllte karrierën si Ambasador, edhe pse u emërua dy herë nga presidenti Joe Biden, por pa e kaluar filtrin e Senatit.
Kostelancik theksoi me respekt edhe periudhën kur u nominua për të qenë Ambasador i SHBA në Shqipëri, duke nënvizuar se ka “vlerësim të madh për atë komb dhe besim në të ardhmen e tij”.
Mesazhin e tij diplomati amerikan e mbylli me fjalët e Winston Churchill: “Suksesi nuk është përfundimtar, dështimi nuk është fatal: është guximi për të vazhduar që ka rëndësi.”
Mesazhi i plotë i Dave Kostelancik
“Sot është dita ime e fundit e punës në Departamentin e Shtetit.
Ka qenë nder dhe privilegj të shërbej, të promovoj dhe të mbroj interesat e popullit amerikan si oficer i Shërbimit të Jashtëm për 36 vjet. Duke cituar Teddy Roosevelt, nuk e kisha menduar kurrë shpërblimin që do të gjeja nga puna kaq e vështirë në një punë që ia vlen. Shoqëria me të gjithë ju ka qenë frymëzimi që më ka mbajtur gjithmonë në lëvizje. Jeni ju që më keni inkurajuar gjatë kohërave sfiduese. Për këtë, ju falënderoj një për një.
Nga shërbimi në Turqi (përfshirë edhe atë në Irakun Verior pas Luftës së Parë të Gjirit në kuadër të operacionit ‘Provide Comfort’), te fakti se isha oficeri i parë i Shërbimit të Jashtëm zyrtarisht i caktuar dhe i pari oficer politik/ekonomik në ambasadën e sapohapur të SHBA në Shqipëri, te shërbimi në Rusi (fillimisht si asistent i posaçëm i ambasadorit gjatë turit të parë dhe më pas si kontribues në një marrëdhënie atëherë më produktive), te puna me peshë në NATO dhe OSBE dhe tre vite në ambasadën amerikane në Hungari, përfshirë dy vjet si i ngarkuar me punë, te shërbimi në Washington në Këshillin e Sigurisë Kombëtare, në drejtimin e programeve për Evropën dhe Azinë në Byronë Ndërkombëtare të Zbatimit të Ligjit dhe në Byronë Evropiane përgjegjës për Zyrën e Çështjeve Ruse, te shërbimi si këshilltar i lartë i Departamentit të Shtetit pranë Komisionit të Helsinkit në Kongres dhe si këshilltar për punët e jashtme (POLAD) pranë Shefit të Shtabit të Përgjithshëm të Ushtrisë, deri te posti i Zëvendës Koordinatorit në Byronë e Kundërterrorizmit – në të gjitha këto kam përfituar nga urtësia, këshillat dhe miqësia juaj.
Dhe, ishte një nder i madh të nominohesha si Ambasador i SHBA në Shqipëri. Kam respektin më të madh për atë komb dhe besim të plotë në të ardhmen e tij.
E mbyll me fjalët e Churchill-it, të cilat i kam përsëritur sa herë që kam lënë pas një kapitull të karrierës sime: ‘Suksesi nuk është përfundimtar, dështimi nuk është fatal: është guximi për të vazhduar që ka rëndësi’.
Ju uroj të keni guximin të vazhdoni të flisni dhe të përpiqeni për paqen, drejtësinë dhe të vërtetën. Kjo është ajo që do të bëj edhe unë”.
