Nga Solange Reyner, Newsmax
Një valë e re protestash “No Kings” (“Jo Mbretër”) kundër administratës së Donald Trump, e organizuar nga projekti Indivisible i mbështetur nga George Soros, po planifikohet për më 18 tetor në mbarë Shtetet e Bashkuara.
Rreth 2.000 protesta “No Kings” u zhvilluan në të gjitha 50 shtetet më 14 qershor, në të njëjtën ditë me ditëlindjen e presidentit Donald Trump dhe paradën ushtarake që shënonte 250-vjetorin e Ushtrisë Amerikane.
“Në qershor, miliona amerikanë të zakonshëm nga të gjitha shtresat e shoqërisë dolën paqësisht në rrugë dhe shpallën me një zë të vetëm: Jo Mbretër. Bota pa fuqinë e popullit, dhe përpjekja e presidentit Trump për një kurorëzim u shemb përballë forcës së një lëvizjeje që po ngrihet kundër abuzimeve të tij me pushtetin,” – thuhet në një postim të grupit në faqen e tyre zyrtare.
“Tani ai po e dyfishon përpjekjen — duke dërguar agjentë të armatosur në komunitetet tona, duke heshtur votuesit, dhe duke u dhënë dhurata miliarderëve ndërsa familjet po luftojnë për të mbijetuar. Kjo nuk është thjesht politikë. Është demokraci kundër diktaturës. Dhe ne, bashkë, po zgjedhim demokracinë.”
Indivisible drejtohet nga Ezra Levin dhe Leah Greenberg. Projekti u krijua në vitin 2016, pas fitores së Trump në zgjedhjet presidenciale.
Grupi, i cili ka marrë më shumë se 7.6 milionë dollarë nga rrjeti filantropik i George Soros që prej vitit 2017, ka qenë i përfshirë në protesta kundër Teslës dhe Shërbimit të Imigracionit dhe Doganave (ICE).
