Një aksident i rëndë rrugor ka tronditur Kroacinë, ku katër persona kanë humbur jetën pasi automjeti me të cilin po udhëtonin ka rënë në det, pranë qytetit Senj.
Sipas njoftimit zyrtar të Departamentit të Policisë Lika-Senj, ngjarja ka ndodhur rreth orës 16:30, gjatë ditës së djeshme në zonën e Bunicës.
Menjëherë pas sinjalizimit, në vendngjarje mbërritën shërbimet e emergjencës dhe ekipet e zhytësve të Shërbimit Kroat të Kërkim-Shpëtimit (HGSS), të cilët u përfshinë në operacionin për gjetjen dhe nxjerrjen e trupave.
Policia konfirmoi se nga automjeti janë nxjerrë katër trupa, përkatësisht dy gra dhe dy burra, të cilët fatkeqësisht nuk kanë mundur të mbijetojnë.
Autoritetet kanë nisur hetimet për të përcaktuar rrethanat e sakta të aksidentit, ndërsa trupat e viktimave janë dërguar në Institutin e Mjekësisë Ligjore në Rijekë për ekspertizë.
Ndërkohë, më herët gjatë ditës, për shkak të erërave të forta, autoritetet kishin shpallur ndalim qarkullimi për automjetet e kategorive I dhe II në rrugën shtetërore DC8 Senj–Karlobag, ku dyshohet se mund të ketë kaluar edhe automjeti i aksidentuar.
