Drejtoria Vendore e Policisë Durrës, gjatë 48 orëve të fundit
Shërbimet e Komisariatit të Policisë Durrës:
-arrestuan shtetasin F. H., 33 vjeç, dhe referuan materialet në Prokurori, ku nisi procedimi në gjendje të lirë, për vëllanë e tij, shtetasin E. H., 30 vjeç, sepse 33-vjeçari ka ushtruar dhunë ndaj nënës së tyre, ndërsa 30-vjeçari është konfliktuar me shtetasin F. H.;
-shpallën në kërkim shtetasit I. F., 45 vjeç dhe G. D., 47 vjeç, të dy banues në Durrës, me detyra përkatesisht vinçier dhe punonjës i sigurisë portuale, në portin e Durrësit, pasi dyshohet se më datë 01.10.2025, në ambientet e doganës, kanë vjedhur 1 motomjet. Punohet për kapjen e 2 shtetasve;
-shpallën në kërkim shtetasin B. M., 54 vjeç, pasi dyshohet se ka ushtruar dhunë ndaj bashkëshortes së vëllait të tij. Punohet për kapjen e 54-vjeçarit;
-kapën shtetasin V. Gj., 32 vjeç, banues në Durrës, i cili ishte shpallur në kërkim, për veprën penale “Plagosje e lehtë me dashje”, pasi dyshohet se më datë 3 tetor 2025, ka goditur me grushte, një 44-vjeçar, për motive të dobëta. Pas konsultimit me prokurorin, u vendos që 32-vjeçari të procedohet në gjendje të lirë;
-kapën shtetasin A. H., 25 vjeç, banues në Durrës, i cili ishte shpallur në kërkim, për veprën penale “Mashtrimi”, pasi dyshohet se nuk ka kthyer një automjet të marrë me qira, më datë 24.09.2025. Pas konsultimit me prokurorin, u vendos që 25-vjeçari të procedohet në gjendje të lirë;
-referuan materialet në Prokurori, ku nisi procedimi në gjendje të lirë për shtetasin E. S., 33 vjeç, pasi dyshohet se ka tentuar të vjedhë në një ambient sportiv publik;
-referuan materialet në Prokurori, ku nisi procedimi në gjendje të lirë për shtetasin J. B., 29 vjeç, pasi iu gjetën në celular, faqe aktive për vënie bastesh sportive;
-referuan materialet në Prokurori, ku nisi procedimi në gjendje të lirë për shtetasin F. M., 19 vjeç, banues në Durrës, pasi u kap në flagrancë gjatë tentativës për të futur lëndë piroteknike, në stadiumin ku do të luhej ndeshja e futbollit “Teuta – Bylis”;
-referuan materialet në Prokurori, ku nisi procedimi në gjendje të lirë për shtetasin Y. L., 35 vjeç (dyshohet me probleme të shëndetit mendor), pasi dyshohet se ka ushtruar dhunë psikologjike ndaj babait të tij, si dhe i ka dëmtuar automjetin.
Specialistët për Hetimin e Krimeve të Stacionit të Policisë Plazh referuan materialet në Prokurori, ku nisi procedimi në gjendje të lirë për shtetasit M. M., 23 vjeç dhe E. M., 50 vjeçe, pasi dyshohet se për motive të dobëta, kanë goditur me grushte, një 50-vjeçare.
Specialistët për Hetimin e Krimeve të Komisariatit të Policisë Kavajë:
-arrestuan në flagrancë shtetasin A. P., 65 vjeç, banues në Kavajë, pasi u kap jashtë banese, në cenim të masës së sigurisë “Arrest në shtëpi”, që i është caktuar për veprën penale “Plagosja e lehtë me dashje”.
-referuan materialet në Prokurori, ku nisi procedimi në gjendje të lirë për 3 shtetas të moshave 15 dhe 16 vjeç, pasi dyshohet se kanë vjedhur sende, në një banesë aktualisht të pabanuar;
-referuan materialet në Prokurori, për vlerësim, në lidhje me ngjarjen e ndodhur mesditën e datës 04.10.2025, te mbikalimi i Vorrozenit, ku shtetasja M. M., 40 vjeçe, dyshohet se në gjendje të rënduar psikologjike, ka tentuar të hidhet nga mbikalimi. Në lidhje me rastin u njoftuan shërbimet sociale të bashkisë, me qëllim ofrimin e ndihmës së integruar për këtë shtetase.
Specialistët për Hetimin e Krimeve të Komisariatit të Policisë Shijak referuan materialet në Prokurori, ku pas konsultimit me prokurorin, nisi procedimi në gjendje të lirë për shtetasin F. C., 29 vjeç, banues në Shijak, pasi dyshohet se më datë 09.09.2025, ka kanosur një 28-vjeçar, për t’i dhënë automjetin, ndërsa më datë 05.10.2025, për motive të dobëta, ka goditur me grusht, drejtuesin e taksisë me të cilën lëvizte në aksin rrugor “Tiranë – Durrës”, si dhe kur është shoqëruar në ambientet e Komisariatit të Policisë Nr. 7, Tiranë, ka deklaruar si të vetin, identitetin e vëllait të tij.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
