Armando Duka, që prej më shumë se dy dekadash drejton FSHF-në, tashmë ka gjetur mënyrën perfekte për të bërë edhe më shumë propagandë duke krijuar televizionin e tij nën emrin e Federatës.
Në emisionin e parë të quajtur “Shtëpia e Futbollit”, Duka njoftoi se FSHF TV, mund të transmetojë vetë kampionatin shqiptar.
Pra, Duka do organizojë kampionatin, do vendosë arbitrat, do japë dënimet… dhe do e transmetojë vetë! Një monopol i plotë.
“Ky TV do prodhojë financa për të mbajtur veten”, – tha Duka, ndoshta duke harruar se FSHF financohet nga UEFA dhe FIFA, jo nga ndonjë biznes privat me të ardhura reklamuese.
Në fund të ditës, duket se “Shtëpia e Futbollit” po kthehet në “Shtëpia e Dukës”, ku edhe sinjalet televizive kontrollohen nga “Presidenti përjetshëm”.
Me pak fjalë: nëse nuk i pëlqen si e transmeton dikush tjetër kampionatin, s’ka problem — e transmeton vetë.
