Real Madrid po planifikon të nënshkruajë me një mbrojtës qendror të ri gjatë afatit të ardhshëm të verës, dhe dëshiron ta bëjë këtë pa shpenzime transferimi. Klubi ka përzgjedhur disa objektiva, dhe njëri prej tyre do të jetë i disponueshëm si lojtar i lirë.
Në javët e fundit është konfirmuar se Real Madrid ka shfaqur interes për Marc Guehi, i cili po ashtu ka tërhequr vëmendjen e klubeve si Liverpool dhe Barcelona.
Qershorin e ardhshëm, 25-vjeçarit i skadon kontrata me Crystal Palace, dhe sipas trajnerit Oliver Glasner (nëpërmjet Empire Of The Kop), tashmë është vendosur që ai do të largohet në përfundim të saj.
“Mendoj se Marc tashmë na ka thënë që nuk do të nënshkruajë kontratë të re, kështu që do të largohet vitin e ardhshëm. Klubi dëshironte [që të qëndronte]. Ne i ofruam një kontratë të re, por ai tha: ‘Jo, dua të provoj diçka ndryshe’, dhe kjo është normale.
Për ne tani mbetet si ta menaxhojmë këtë situatë. Cila është mënyra më e mirë për ta bërë këtë hap të ardhshëm? Për këtë po flasim bashkë.”
Real Madrid po monitoron gjithashtu situatat e Ibrahima Konate te Liverpool dhe Dayot Upamecano te Bayern Munich, por ka arsye të forta për të besuar se Guehi duhet të jetë lojtari që ata duhet të synojnë. Ai ka performuar në një nivel shumë të lartë gjatë 2-3 viteve të fundit dhe tashmë është bërë pjesë e formacionit titullar të Anglisë në prag të Kupës së Botës së ardhshme.
Guehi është shumë i interesuar t’i bashkohet Real Madridit, kështu që nëse vjen një ofertë nga “Los Blancos”, ka gjasa të mëdha që ai të përfundojë në “Santiago Bernabéu” verën e ardhshme – dhe në këtë mënyrë, do të bëhej anglezi i tretë në katër vjet që i bashkohet klubit.
