Pirk, si drejtues i projektit kërkimor “Wildfire Twins”, synon t’u mësojë makinave të lundrojnë në mënyrë autonome në zjarret e egra dhe t’i shuajnë ato duke përdorur inteligjencën artificiale (IA) në vitet e ardhshme.
I bazuar në Universitetin Christian-Albrechts të Kielit, projekti merr rreth 2 milionë euro (2.3 milionë dollarë) fonde evropiane.
Por për fat të keq, roboti është ende larg vendosjes në përdorim, pavarësisht shkatërrimit të shkaktuar nga zjarret e shumta që kohët e fundit përfshiu Evropën Jugore.
Zjarrfikësit u sforcuan deri në kufijtë e tyre në vende si Spanja ose Greqia, me kombe të tjera që dhanë ekspertizë dhe pajisje për të lehtësuar ngarkesën.
Pirk dhe ekipi i tij janë ende të zënë duke bërë kërkime bazë dhe në shikim të parë, imazhet e simulimit në ekranin e Pirk ngjajnë me videolojëra.
Studiuesit simulojnë djegien e pemëve, shkurreve dhe pyjeve të tëra në softuerin e tyre.
“Në simulimin tonë duhet të gjenerojmë të dhëna që duken sikur vijnë nga një skenar i një zjarri të vërtetë”, thotë Pirk. “E gjithë gjëja duhet të duket fotorealiste, si një zjarr i vërtetë. Është e ngjashme me një lojë video, vetëm më realiste.”
Vetëm kamerat video nuk janë të mjaftueshme pasi imazhet i japin makinës shumë pak informacion rreth zjarrit. “Për momentin, roboti ende nuk e di saktësisht se çfarë të bëjë kur zbulon flakë”, thotë Pirk.
“Thjesht nuk ka një model për zgjidhje. Nuk e di nëse duhet ta shuajë flakën përpara saj drejtpërdrejt apo sa distancë duhet të mbajë.”
Trajnim virtual
Studiuesit synojnë t’i mësojnë inteligjencës artificiale të gjejë shtigje të sigurta përmes skenarëve realistë të zjarrit duke përdorur një mjedis trajnimi virtual. “Ndërsa unë mund të ndërtoj lehtësisht një pyll nga një imazh satelitor, është shumë më e vështirë të modeloj shkurret”, thotë Pirk.
Imazhet satelitore nuk japin informacion nëse zjarri mund të kontrollohet. Por kjo është thelbësore për një model të besueshëm pyjor. “Kjo është arsyeja pse po punojmë në modele matematikore dhe po ndërtojmë modele 3D të pemëve, shkurreve dhe barërave individuale, ngjashëm me një lojë kompjuterike.”
Aktualisht, Pirk po punon me katër shkencëtarë të rinj në këtë projekt. Roboti trajnues Byte, i cili kushton afërsisht 100,000 euro dhe peshon 25 kilogramë, synon t’u ofrojë zjarrfikësve informacion të detajuar rreth skenarëve të zjarreve në të ardhmen.
Për simulimin e stërvitjes, kërkohet një numër i madh imazhesh fotorealiste të situatave të zjarreve në pyje, të cilat do të përdoren për të trajnuar inteligjencën artificiale.
“Shpresojmë të kemi një mjedis trajnimi virtual brenda pesë vjetësh. Megjithatë, Byte nuk do të jetë ende në gjendje të kryejë misione zjarrfikëse”, thotë Pirk.
Me origjinë nga Frisia Lindore, Pirk-ut i lindi ideja për projektin e tij kërkimor ndërsa punonte për një kompani teknologjike në Shtetet e Bashkuara.
Testimi i zjarrit
Eksperimentet praktike janë gjithashtu të nevojshme. Byte mbledh të dhëna mbi zjarret me intensitete të ndryshme në një shkollë zjarrfikësesh në Schleswig-Holstein, landin më verior të Gjermanisë.
Pasi teknologjia të zhvillohet plotësisht, ajo mund të përdoret në zjarret e bimësisë, thotë kreu i grupit René Heyse. “Këto po bëhen gjithnjë e më të shpeshta.”
Heyse tregon në një enë zjarri se si tymi mund të ndizet gjatë një zjarri. “Së pari po përpiqemi ta kuptojmë zjarrin me robotin”, thotë Pirk. Inteligjenca Artificiale duhet të mësojë të interpretojë flakët. “Ashtu siç ne njerëzit mësojmë të mos i afrohemi shumë një zjarri”.
Eksperti i zjarrit Heyse shpreson se teknologjia do t’i ndihmojë njerëzit në vlerësimin e zjarreve. “Nga vjen zjarri, në cilin drejtim po përhapet dhe a ka njerëz në zonë?”
Inteligjenca Artificiale mund të jetë në gjendje të rekomandojë masa fillestare, pasi të ketë llogaritur se si ka të ngjarë të zhvillohet zjarri. Një platformë e mbështetur nga inteligjenca artificiale – qoftë dronë apo robotë – mund të jetë gjithashtu një mjet i vlefshëm për të mbajtur larg rrezikut ekipet e ndihmës së shpejtë, thotë ai.
A mund të ndihmojë IA?
“Faza vendimtare është në të vërtetë vlerësimi i situatës”, thotë Heyse. Në raste emergjence, vendime të tilla duhet të merren me shpejtësi maksimale.
IA mund të ndihmojë në identifikimin e zonave në rrezik shembjeje ose fenomeneve ekstreme të zjarrit, siç janë shtresat e tymit të nxehtë që janë gati të ndizen. “Nëse një platformë e mbështetur nga IA mund të më tregojë tashmë të gjitha këto, unë kam shumë më tepër kohë jashtë, për shembull, për të dalluar njerëzit në dritare dhe për të ndërmarrë menjëherë veprime”, thotë ai.
Në planin afatgjatë, shkencëtari i kompjuterave Pirk parashikon sisteme autonome që mund të luftojnë në mënyrë të pavarur zjarret, ndërsa këto përshkojnë pyjet e botës./ DPA News.
