Gjykata Kushtetuese e Republikës së Shqipërisë ka vendosur të deklarojë përfundimin e mandatit të gjyqtares Sonila Bejtja, duke i hapur rrugë procedurave për plotësimin e vakancës së krijuar.
Vendimi u mor më 24 tetor 2025, pas shqyrtimit të kërkesës së paraqitur nga Presidenti i Republikës së Shqipërisë, me numër regjistrimi 1/1 (P) 2025, datë 30 janar 2025, që kishte si objekt “Deklarimin e mbarimit të mandatit të gjyqtarit të Gjykatës Kushtetuese”.
Në dispozitivin e vendimit, Gjykata Kushtetuese ka vendosur:
Të deklarojë mbarimin e mandatit të gjyqtares Sonila Bejtja në datën 25 prill 2025;
Të njoftojë Presidentin e Republikës së Shqipërisë, si organin kompetent për emërimin e anëtarëve të rinj;
Të njoftojë gjithashtu Kuvendin e Republikës së Shqipërisë për vendimin e marrë.
Në vijim, vakanca e krijuar do t’i përcillet Presidentit Bajram Begaj, i cili do të ndjekë procedurat ligjore për emërimin e anëtarit të ri të Gjykatës Kushtetuese, sipas dispozitave të Kushtetutës dhe ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar.
