Situata në Vaun e Dejës është problematike për shkak të reshjeve të shiut që kanë shkaktuar përmbytje në të gjitha njësitë administrative, tha në një deklaratë për mediat kryebashkiaku i Vaut të Dejës Kristian Shkreli.
Shkreli shtoi se lumi i Glinës ka dalë nga shtrati dhe deri më tani raportohet për prezencë uji në 100 banesa në këtë bashki.
“Vau i Dejës është më problematik, përroi i glinës ka dalë jashtë shtratit, po bën përmbytje. Janë rreth 100 shtëpi që kanë prezencë të ujit, dëmet janë të mëdha në bagëti dhe shpendë, kosheret e bletëve, shpresojmë të mos rrezikojmë jetën e njerëzve sepse situata është mjaft e rëndë.
Stafi i bashkisë është në terren, është përkrah njerëzve, besoj që çdo gjë do shkojë mirë në evakuim, por shpresoj të mos kemi nevojë për evakuim. Problemi kryesor është përroi i Glinës, me fondet e bashkisë së Vaut të Dejës është i pamundur realizimi i këtij projekti”, tha Shkreli.
