Një tjetër mbrëmje zhgënjyese për Juventusin, që nuk arrin të ndalojë rënien e lirë. Një ndeshje e zbehtë ndaj Lacios, pa shpirt dhe pa reagim, që pasqyron më mirë se kurrë krizën e thellë në të cilën ndodhet skuadra e Igor Tudor.
Goli i vetëm i takimit, ai i Toma Bashiq, mjaftoi për të vulosur fatin e një sfide që Juventus nuk arriti kurrë ta kontrollonte. Loja e ngadaltë, mungesa e ideve dhe paaftësia për të krijuar raste të pastra janë bërë tashmë shenja dalluese të një ekipi që dikur frikësonte çdo kundërshtar.
Por imazhi më i fortë nuk erdhi nga fusha, por nga tribuna. Në përfundim të ndeshjes, lojtarët bardhezi u drejtuan drejt sektorit të tifozëve të tyre për t’i falënderuar, ndoshta edhe për të kërkuar mirëkuptim pas një tjetër zhgënjimi. Përgjigjja ishte e prerë: refuzim total.
Tifozët, të mbledhur në sektorin e tyre në “Olimpico”, u kthyen mbrapsht, duke mos pranuar as përshëndetjen simbolike të lojtarëve. Një skenë e rëndë, që tregon përçarjen e thellë mes skuadrës dhe mbështetësve të saj.
Kjo disfatë e fundit thellon një krizë që nuk është më vetëm sportive, por edhe psikologjike. Juventus nuk fiton prej tetë ndeshjesh dhe nuk ka shënuar asnjë gol në katër të fundit, shifra që rikthejnë në kujtesë periudha të errëta të historisë bardhezi.
