Boksieri Manny Pacquiao ka lënë të kuptohet se një ndeshje revanshi mes tij dhe Floyd Mayweather mund të jetë në plan vitin e ardhshëm. Dy legjendat e boksit u ndeshën në një sfidë në maj 2015 për titullin e unifikuar botëror të peshave të lehta, ku Mayweather mori fitoren me vendim unanim të gjyqtarëve.
Të dy boksierët ishin tërhequr më parë nga sporti, por duket se nuk janë në gjendje të qëndrojnë larg ringut me Mayweather që garon në evente “show”, ndërsa Pacquiao u rikthye në boksin profesional në korrik të këtij viti.
“Tani për tani kemi shumë negociata për duelin tim të radhës, mes të cilave edhe një duel të mundshëm me Floyd Mayweather“, tha Pacquiao. “Ka shumë negociata në vazhdim tani, kështu që është e vështirë të planifikoj se çfarë sfide do të zhvilloj. Po pres negociatat përfundimtare”, tha filipinasi.
“Do të doja shumë të kisha një përballje tjetër, një ndeshje revanshi me Floyd Mayweather. Kështu që shpresoj që në negociata, të mund ta kuptojmë njëri-tjetrin dhe të negociojmë mirë”, tha më tej Pacquiao.
Pacquiao fillimisht u pensionua në vitin 2021, me një rekord prej 62 fitoresh, 8 humbjesh dhe 2 barazimesh, duke luftuar në disa nga sukseset më të mëdha të viteve 2000. Ai tha se gjithmonë kishte kërkuar kundërshtarët më të fortë në mënyrë që të mund të vazhdonte të testonte veten.
filipinasi humbi ndaj Mayweather në vitin 2015 në një përballje që ishte cilësuar si “ndeshja e shekullit”, por më vonë ai zbuloi se ishte penguar nga një dëmtim në shpatull. Ndërkohë, ai do të përqendrohet te djali i tij, Jimuel Pacquiao, i cili do të debutojë si profesionist kundër amerikanit Brendan Lally më 29 nëntor në Kaliforni.
