Kina tha sot se nuk po kryen asnjë provë bërthamore, duke iu përgjigjur kështu Presidentit të SHBA-së Donald Trump , i cili tha se Rusia dhe Kina po kryejnë prova, “por nuk po flasin për këtë”, pa sqaruar megjithatë natyrën e tyre.
“Kina gjithmonë ka ndjekur rrugën e zhvillimit paqësor, ka ndjekur një politikë të mospërdorimit të parë të armëve bërthamore dhe ka ndjekur një strategji bërthamore të bazuar në vetëmbrojtje dhe respekt për angazhimin e saj për të pezulluar testet bërthamore”, tha zëdhënësja e Ministrisë së Jashtme kineze, Mao Ning, në një konferencë të rregullt për shtyp pas komenteve të fundit të Trump.
Zëdhënësja e Ministrisë së Jashtme kineze shprehu shpresën se Shtetet e Bashkuara “do të marrin masa konkrete për të mbrojtur sistemin ndërkombëtar të çarmatimit dhe mospërhapjes dhe për të ruajtur ekuilibrin strategjik dhe stabilitetin global”.
“Rusia po teston dhe Kina po teston, por ata nuk po flasin për këtë”, tha presidenti amerikan në një intervistë të transmetuar në CBS të dielën.
“Do të bëjmë testime, sepse (vende) të tjera po bëjnë testime. Koreja e Veriut po bën testime. Pakistani po bën testime. E dini, sado të fuqishëm që janë (armët bërthamore), bota është e madhe. Nuk e dini domosdoshmërisht se ku po bëjnë testime. Ata po bëjnë testime nën tokë, thellë-thellë, ku bota nuk e di vërtet se çfarë po ndodh. Ndjen një dridhje të vogël. Ata po bëjnë testime dhe ne jo. Duhet ta bëjmë”, tha Trump.
“Ajo që po them është se do të testojmë armë bërthamore siç po bëjnë vendet e tjera”, këmbënguli Trump, pa iu përgjigjur një pyetjeje nëse armët bërthamore do të shpërthenin, diçka që SHBA-të e kanë bërë që nga viti 1992.
Megjithatë, Sekretari i Energjisë i qeverisë së tij, Chris Wright, siguroi dje për Fox News se nuk do të ketë “shpërthime bërthamore”.
